كانت مرايتي في الحياة وحياتي انتهت بعدها: مصطفى عبده يبكي أثناء حديثه عن زوجته وطبيعة الحياة بعد وفاتها

قال مصطفى عبده نجم الأهلي السابق، أن صالح سليم رئيس الأهلي السابق أخبرني بأنني سأكون مشروع لاعب كبير ولكن لابد أن اختار أحد الاختيارات الأربعة، ويستعرض موقع تحيا مصر تصريحات مصطفى عبده.

تصريحات مصطفى عبده

وأضاف مصطفى عبده في تصريحات تليفزيونية مع الإعلامي إبراهيم فايق على أم بي سي مصر 2، صالح سليم قالي هقولك 4 حاجات وتختار منهم اللي ينفعك، السهر والستات والخمرة والكورة، وقالي هتختار أي قولتله هختار الكورة ياكابتن صالح، قالي كلكم بتقولوا كده في الأول، وكان ردي أني عاوز أكون موجود في الأهلي، وكنت وقتها سألعب على حساب إبراهيم عبد الصمد وهو مطلب جماهيري.

وتابع مصطفى عبده، من الصعب الحكم على إدارة محمد رمضان في النادي الأهلي حاليا ولكن أنا متأكد من أنه سينجح مع النادي الأهلي في الفترة المقبلة ولابد أن يلتزم إمام عاشور في الفترة المقبلة مع النادي الأهلي إذا اراد الاستمرار مع الفريق.

وأكمل مصطفى عبده، رسالتي للاعيبه النادي الأهلي، إحمدوا ربنا أنكم موجودين في النادي الأهلي، ومحمود الخطيب كان لاعب تاريخي ومش هيتكرر من تاني وهو أسطورة الأساطير وكان يمتلك مهارة فردية غير عادية، ومفيش حد يقدر يعمل حد لأن الناس كانت بتقول مصطفى عبده هو اللي عمل محمود الخطيب والكلام دا غير صحيح.

مصطفى عبده مع إبراهيم فايق

وأشار مصطفى عبده، محمود الخطيب مش هيتكرر تاني ومفيش أي حاجه هتغير بيني وبين محمود الخطيب وفيه ناس بتحاول توقع بيني وبينه وعمره ما هيحصل نهائيا ومش هيتكرر في تاريخ الكورة تاني.

وأردف مصطفى عبده، مراتي رحمه الله عليها كانت كل حياتي ولما ماتت أنا قولت كل حياتي انتهت خلاص وهي اللي عملت اسم مصطفى عبده، وعلى مدار 38 سنة كانت سبب في نجاحي وكانت كل شيء في حياتي، وموت مراتي خليني جريء على الموت.

واستكمل مصطفى عبده، استمريت لمدة 5 سنين بعد وفاة زوجتي مش عارف أنا بعمل أي في حياتي، ووزني نزل 17 كيلو في 6 شهور، وولادي كانوا سبب أني أفوق من تاني وكنت قاعد في البيت لمدة 5 سنين مش بخرج.

واختتم مصطفى عبده تصريحاته، مراتي كانت مرايتي في الحياة، ورفضت تخليني اعتزل كرة القدم وتراجعت عن الاعتزال بسببها، وقالتلي كمل كمان سنتين في الملاعب، والفضل بعد ربنا في اسمي هي مراتي هالة، وبزورها كل يوم جمعة وبتكلم معاها وحاسس إنها بتسمعني ولا أثق في حياتي إلا في بناتي الاتنين وبس.