ليلى طاهر: شائعات وفاتي فشل صحفي ومبقتش أتأثر بيها.. وأرفض تقديم سيرتي الذاتية في عمل فني

طمأنت الفنانة ليلى طاهر، جمهورها على حالتها الصحية في مداخلتها الهاتفية مع الإعلامية يارا أحمد، في برنامجها نجمك مع يارا، المذاع عبر شاشة قناة “هي”، وذلك بعد الشائعات التي لاحقتها خلال الفترة الماضية، معربة عن استيائها بسبب تلك الشائعات.

ليلى طاهر تطمئن جمهورها على حالتها 

وجاءت أبرز تصريحات ليلى طاهر مع يارا أحمد والتي رصدها موقع تحيا مصر، على النحو الآتي:

 - أنا كويسة أوي الحمد لله وأموري ماشية.

 - الشائعات اللي بتتكتب دي كلها مش صحيحة.

الشائعات اللي بتتكتب بتزعج اللي حواليا أكتر ما بتزعجني، وبيتسببوا في إزعاج لـ أقربائي مسافرين، وكل اللي حواليا بيتنكدوا بيفتكروا الموضوع بجد وبيدوروا عليا.

 - أنا مبزعلش من الشائعات لأن كل حاجة وليها ميعاد، ومبيهمنيش النهاردة ولا بكره، من كتر ما كتبوا أخبار كاذبة مبقاش ليها تأثير عليا ولكن ليها تأثير على الناس.

 - الشائعات دي فشل صحفي، لأن لو عندك موضوع كويس تشد بيه القارئ مكنتش لجأت لاستخدام اسم فنان علشان تعمل شائعة كاذبة، وفنانين كتير بيعملوا معاهم كده.

ليلى طاهر: مينفعش أرجع في قرار اعتزالي  

 - مينفعش أرجع في قرار اعتزالي لأن المدة طولت، في أولها كان ممكن أفكر أني أفكر أرجع لو اتعرض عليا عمل كويس، ولكن دلوقتي حتى لو جالي ورق كويس، لأن ليلى طاهر دلوقتي مختلفة عن اللي الناس عرفتها.

 - كل زملائي اللي موجودين في مصر بنكلم بعض في المناسبات، ولكني مش مختلطة لأني دلوقتي عايشة حياة أسرية أكتر منها فنية، وقاعدة مع أبنائي وأحفادي.

 - كل مرة ولها ناسها الحلوين الناجحين، وفي فترة حصل نكسة في الفن بسبب الظروف السياسية، ولكن رجع الفن المصري تاني ينتعش من جديد وبقى في نجوم حلوين وأعمال كويسة.

 - إحنا اكنا في زمن كان فيه كُتاب كبار أعمالهم لا تنسى.

 - أنا بتابع لأني بحب الفن وبحب أعرف الفن المصري وصل لإيه، والفن دلوقتي وصل لصعود دائم.

 - مينفعش يتعمل السيرة الذاتية بتاعتي، مينفعش حد يحل محل حد، نكتب عن السيرة الذاتية ككتاب آه، لكن نجيب ممثلة ونقول دي ليلى طاهر وتمثل حياتها لأ مفضلش ده.

عاجل| تدهور الحالة الصحية للفنانة ليلى طاهر.. اعرف الحقيقة

ليلى طاهر: وصيتي مصر كلها وأنا مبهتمش بالتريند

 - وصيتي مصر كلها، وكلنا نحب مصر ونعمل لمصر ويكون ولائنا لمصر.

 - الميزة الوحيدة من شائعات وفاتي أني بحس بحب الناس وفرحتهم لما أنا اللي برد عليهم وأني مازلت على قيد الحياة، ده بيسعدني جدًا وأنا بحب الجمهور المصري اللي أنا طلعت بيه من تاريخي الفني.

 - نصيحتي للسيدات أن لا نهمل أولادنا على الإطلاق مهما كنا مشغولين، فالتربية مسؤولية الأم تجاه ابنائها، وبعدين أي عمل آخر.

 - أنا مبهمتمش بالتريند خالص.

 - أنا متحيزة للفن المصري القديم الأصيل، ولكن بعترف أن الفن المصري في تقدم.