نجل الفنان أسامة عباس يكشف تفاصيل وأسرار خاصة عن والده

تحدث نجل الفنان أسامة عباس عن تفاصيل واسرار في حياة والده وذلك على هامش ندوة تكريمه في المهرجان القومي للمسرح المصري، والذي اعتذر عنها الفنان لظروف طارئة وخارجة عن إرادته.

نجل الفنان أسامة عباس: والدي بدأ مشواره كمحامي الصبح وممثل بالليل 

قال نجل الفنان أسامة عباس في تصريحات رصدها موقع تحيا مصر: والدي بدأ مشواره محاميًا بيشتغل في شركة الصبح وبعد الظهر يروح المسرح، وفضل عشر سنين جامع بين شغله في شركة النصر لـ التلفزيون وبليل بيروح المسرح وده كان مجهود كبير بس كان حابب ده؛ لأنه بيحب الفن جدًا ومن ضمن الأسباب الأساسية أنه بيشتغل في الشركة الصبح والمسرح بليل ويجمع بين العملين، وكان ملتزم أن عنده أسرة لازم يعولها وقعد فترة جامع بين العمل في الشركة والفن.

نجل الفنان أسامة عباس يكشف مرحلة النقلة النوعية في حياته 

واستكمل نجل أسامة عباس حديثه، قائلا: كانت النقلة الحقيقية في مشوار والدي الفني، عند مشاركته في الفوازير مع ثلاثي أضواء المسرح وحصل معه  تعارف سريع بينه وبين الجمهور، والناس بدأت تحبه والفوازير كانت محبوبة، واتجه بعدها أنه يبقى ممثل فقط، وهو كان وارث حب الفن من جدتي، لأنها كانت بتحب الفن وبتحب تتفرج على الأفلام وده مش متعارف عليه، وكان عندها جهاز سينما.

محمد رياض: اتفاجئت بوجود شهيرة في المهرجان القومي للمسرح.. ووجودها أضاف له وقار وقيمة

نجل أسامة عباس: انا وأخواتي طلعنا بنحب القراءة لوالدي 

بالنسبة للثقافة جدي كان عنده مكتبة ووالدي كمل عليها وهي مكتبة ثرية جدًا وفيها جزء كبير من الكتب التاريخية والمجلات وعنده مجلدات من سنة 20؛ لأنه كان عاوز يعرف ساعتها الحياة عاملة أزاي، وكان بيروح سوق الأزبكية ويشتري المجلدات القديمة، وكان بيقرأ في المجلات وكان ليها تأثير كبير وده استمر معاه كتير، وكان عنده فرصة للالتقاء بكتاب كبار زي أنيس منصور وجمال بدوي وغيرهم، وكانوا بياجوا زيارة لينا البيت، وده كان بيدينا الفرصة نتعرف ع الناس العِظام ونتكلم معاهم.

واختتم: أنا وأخواتي طلعنا بنحب الكتب والقراءة مثل والدي، وأنا باخد منه كتب بدل ما أشتري وهو بيحب المزيكا، فكلنا طلعنا بنحب المزيكا مثله، وبيفضل طول الوقت ياخد رأينا في أعماله وهو مقدمش أعمال وحشه في تاريخه الفني.