أكسجين حياة.. نجمات أثرن الجدل بسبب مهنة الرقص الشرقي

أثارت نجمات الرقص الشرقي في مصر موجة عارمة من الانتقادات بسبب تصريحاتهم الجريئة عن الرقص الشرقي في مصر، كما رأت بعضهن أن بدل الرقص حاليًا غير مناسبة بسبب العري الذي تعتمد عليه الراقصات في حفلاتهم.

وفي نفس السياق رأت بعضهن أن الرقص لا حرمانية فيه واستدلت بذلك على حديثها مع الشيخ محمد متولي الشعراوي رحمه الله، في تصريحات تلفزيونية، وما بين هذا وذاك رصد لكم موقع تحيا مصر أبرز تصريحات لأشهر نجمات الرقص الشرقي في مصر، واللاتي أثرن الجدل بها وتصدرن محركات البحث.

نجوى فؤاد: الشيخ الشعراوي قالي لو حلال أو حرام مكنش ربنا فتح لك السكة دي

تصدرت الراقصة والفنانة نجوى فؤاد محركات البحث عقب تصريحات المصيرة للجدل في إحدى لقاءاتها التلفزيونية، وبسؤالها عن الرقص الشرقي، قالت: "مرة سألت الشيخ الشعراوي الرقص حلال ولا حرام، قالي لو هو حلال أو حرام مكنش ربنا فتح لك السكة دي ولا نجحك فيها، لكن في النهاية هتتحاسبي عنده هو، وبعدها مفكرتش اعتزل أو أتوب لأني معملتش حاجة غلط".

ورأت نجوى فؤاد أن الراقصات من أوكرانيا يعتمدن على العري، قائلة:  "بيصرفوا على البدل بتاعتهم كويس مع أنها عارية شوية وأنا ضد ده، أنا مش راضية عن بدل الرقص الأيام دي لأنها غير محتشمة ومش حلوة، ده بكيني مش بدلة رقص، لا ديننا ولا تقليدنا ولا أخلاقيتنا تسمح تبقى كده، ولو رجع بيا الزمن مش هلبس بدلة رقص، ولا هعمل إغراء".

فيفي عبده: "الرقص أكسجين الحياة وبيجري في دمي وروحي

في حين رأت الفنانة فيفي عبده أن مهنة الرقص لها احترامها وقالت في كل مرة تُسئل فيها عن الرقص: "ربنا هو اللي هيحاسبنا وكل واحد هيتحاسب، وإحنا ناس كويسين ومحترمين جدًا واللي مش عاجبه ميتفرجش علينا، واللي بيهاجمني أو بيمدح فيا له الحرية في اللي بيقوله ولكن مش هقبل اللي يسب في مهنة الراقصة، وده وخط أحمر بالنسبة لي".

كما قالت عن أداءها مناسك العمرة من أموال الرقص: "أنا مابفهمش في الدين ولا السياسة، اللي يفتي في ده الناس بتوع الدين، وده شيء بتاع ربنا مش بتاع العبد، عشان يحكم هو حرام ولا حلال، الرقص مهنة زي المهن كلها بتعب وبشقى فيها"، وفي لقاء فيفي عبده الأخير مع مجلة "بلاستيك" اللبنانية، قالت: "الرقص هو أكسجين الحياة بالنسبة لي، وبيجري في روحي ودمي".

دينا: " الرقص هو حياتي ومش بعرف أعيش من غيره"

وفي نفس السياق، كشفت دينا عن رأيها الشخصي في الرقص الشرقي في لقاء سابق لها مع الإعلامية لميس الحديدي في برنامج كلمة أخيرة، وقالت: "أنا بعشق الرقص وده أكبر حب بالنسبة ليا بعد علي ابني، لسة بخاف قبل ما أطلع على المسرح ولما بعمل فستان أو بدلة جديدة ببقى عايزة أعرف رأي الناس وهل أنا صح ولا غلط، وبخاف على جسمي إنه يتغير علشان الرقص، الرقص هو حياتي ومش بعرف أعيش من غيره، مش هعرف أبطل رقص لأنه جزء من تكويني وحياتي".

لوسي: " أنا مش بعمل بجاحة أنا بعمل فن"

والجدير بالذكر أن الفنانة والراقصة لوسي أكدت على أهمية الرقص الشرقي كون مصر تعترف به رسميًا، وقالت في تصريحات تلفزيونية سابقة لها: "أنا مش بعمل بجاحة أنا بعمل فن، بلدي معترفة به ومرسوم على جدران القدماء المصريين، ونصيبي أبقى رقاصة وأكل من الرقص، أنا حابة الفن واشتغلت في الأفراح وأنا عندي 11 سنة".

كما قالت: "أنا ماندمتش عشان معملتش حاجة غلط، أنا عملت حاجة العالم كله بيحبها وبيقدرها، اشتغلت في سن صغير عشان كان عندي ظروف وسيبت المدرسة عشان أجيب أكل لأسرتي، بس ربنا أداني تمن حلو الناس بتحبني وبحب الفن".