بيتر ميمي: إنتاج مسلسل الحشاشين مبخلش بحاجة.. ومظنش أن في حد تاني ممكن يعمل حسن الصباح غير كريم

تحدث المخرج بيتر ميمي عن تفاصيل مشاركته في مسلسل الحشاشين، الذي نافس في الموسم الرمضاني الماضي 2024، وذلك من خلال لقاء له ببرنامج كلمة أخيرة، مع الإعلامية لميس الحديدي، عبر شاشة تلفزيون قناة أون.

بيتر ميمي يتحدث عن مسلسل الحشاشين

وقال بيتر ميمي في تصريحاته التي يرصدها موقع تحيا مصر: احنا في مصر كنا غير مؤهلين لإنتاج عمل تاريخي، معندناش أسلحة ولا ملابس ولا مواقع تصوير نقدر نقوم بيها، ففكرة أننا نبدأ من أننا هنصنع دا ازاي وفين، دا كان مجهود كبير جدا وكل دا كان بالنسبالنا بنبدأ من الصفر، والحمد لله أننا قدرة نعمل دا في الوقت دا.

وتابع: اليوم اللي كلموني فيه على المسلسل هو اليوم اللي كريم عبد العزيز وافق فيه يعمل حسن الصباح، وكريم لعب الدور من منطقة منضبطة جدا وشخصية حسن الصباح شخصية فذة وممكن تثير إعجابك، لكنها شخصية شيطانية وشرير جدا، والشخص الشرير ليه جاذبية بدليل أنه ليه أتباع، وأنا مظنش أن في حد تاني ممكن يعمل حسن الصباح.

سوزان نجم الدين: بيتر ميمي مخرج عالمي وأعشق الجمهور المصري

بيتر ميمي: مكنش في إمكانيات بمصر نعمل بيها مسلسل الحشاشين واشترينا حصنة من نزلة السمان

شركات الإنتاج ومسلسل الحشاشين

وعن الحوار الذي دار بين بيتر ميمي وشركة إنتاج مسلسل الحشاشين قال: لما جالي مسلسل الحشاشين وأول حاجة قولتها للإنتاج انتو عارفين دا هيتكلف كام، دا عشان يطلع مظبوط وحقيقي الحد الأدنى بتاعه في التكلفة كبير جدا وأستاذ تامر مرسي وحسام شوقي قالولي احنا عاوزين نعمل عمل صناعة مصرية كبيرة نفخر بيها والناس مبخلتش بحاجة خالص.

واضاف عن التحضيرات للعمل: سافرنا كازاخستان صورنا فيها 7 أيام وصورنا في مالطا يوم واحد بتاع المركب، والباقي في مصر، احنا رجعنا لكتب كتير جدا والمتاحف وعملنا سيرش كبير جدا جدا لشهور.

بيتر ميمي يرد على تعليقات الجمهور حول مسلسل الحشاشين

وسبق وأن حرص المخرج بيتر ميمي الرد على تعليقات الجمهور حول مسلسل الحشاشين منذ طرح حلقته الأولى، وذلك من خلال منشور عبر حسابه الشخصي على موقع التواصل الاجتماعي فيسبوك.

وكتب بيتر ميمي في منشوره: طيب كل سنة وأنتم طيبين.. مع أني مكنتش حابب اتكلم علشان دول كلهم ٤ حلقات.. مبدأيا المسلسل من وحي التاريخ وده مكتوب نصا في التترات يعني مش وثيقة تاريخية لكنه دراما تاريخية.. هو المخرج العالمي تارنتينو لما قتل هتلر فى السينما كان حقيقة؟ أو نابليون في فيلم ريدلى سكوت الاخير هل ده نابليون اللي في كتب التاريخ؟ ديه دراما تاريخية.. حاولنا نعمل خيال لفترة من الفترات لكن في شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية.