أحمد العوضي يتأثر على الهواء: اتأثرت نفسيًا ببعدي عن ياسمين عبد العزيز وهي أجدع إنسانة

تحدث الفنان أحمد العوضي خلال حواره مع الإعلامية منى عبد الوهاب في برنامج ع المسرح عن تفاصيل انفصاله عن الفنانة ياسمين عبد العزيز، كما صرح عن السبب وراء الانفصال لأول مرة وظهرت عليه غلامات التأثر والتوتر بشكل كبير أثناء حديثه.

أحمد العوضي يتأثر على الهواء ويكشف سبب الانفصال عن ياسمين عبد العزيز

وكشف أحمد العوضي خلال استضافاه في برنامج ع المسرح والذي يرصده موقع تحيا مصر عن مكانة الفنانة ياسمين عبد العزيز لديه وقال: "ياسمين هتفضل الأهم في حياتي حتى بعد الانفصال لان الانفصال نصيب وانفصلنا انفصال راقي علي اد احترام الناس لينا..و احترامنا لنفسنا ولازم الناس تشوفك راقي و قدوة.. محدش فينا أثر في حق التاني ومحدش فينا كان وحش مع التاني، دا بيبقي قضاء وقدر هي الحب الحقيقي والوحيد في حياتي ومش بقلل من أي شخص دخل حياتي، وأي حد يدخل حياتي لاني بقول الحقيقة مش هقعد أجمل الكلام وهي عملتلي اجدع الحاجات في حياتي".

برنامج ع المسرح| أحمد العوضي: اتأثرت نفسيًا بالانفصال عن ياسمين

وتابع العوضي حديثه مع الإعلامية منى عبد الوهاب كاشفًا كيف تخطى فترة الانفصال بينه وبين ياسمين عبد العزيز، قائلًا: "عيشت معاها أيام فيها حب ونجاح وازمات وحروب ومرض وهي وقفت جنبي زي ما انا كنت جنبها، لما تعبت بعد ما اتطلقنا هي اللي جت وقفت معايا محدش بيعمل كده، فهي بغض النظر عن انها النجمة الاهم في الوطن العربي.. الست دي حاجة كبيرة جدا في حياتي، تعبت نفسيًا واتأثرت ومبتكسفش اقول كده وملهاش علاقه باني جامد وكده.. ودي قصة حب كبيرة مش عاديه ولو عادي مكنتش وصلت للناس بالشكل دا ما كل يوم اتنين بيحبوا بعض اشمعنا دي ومحدش بيضحك على الناس".

برنامج ع المسرح| أحمد العوضي: كلامي هو اللي يمشي في البيت

وتطرق أحمد العوضي خلال حواره في برنامج ع المسرح ليتحدث عن قناعاته وأسلوب حياته قائلًا: "أنا كلامي هو اللي يمشي في البيت مفيش حاجه اسمها انا صح وهي صح حد تالت هيجي يحكم مابينا يعني ولا ايه، ولو مشيت مره ومره يبقي احنا كده مش متجوزين في قرارات مصيرية متقبلش القسمة على اتنين ومنها مواعيد الدخول والخروج هو دا مفيهوش غلط ماهي مش هندخل ونخرج براحتنا".

برنامج ع المسرح.. أحمد العوضي يكشف غرض مشهد ضربه في مسلسل حق عرب

وكشف أحمد العوضي الغرض الرئيسي وراء مشهد ضربه في مسلسل حق عرب وأنه ليس مجرد مشهد به عنف ضمن أحداث المسلسل وقال: "مشهد الضرب في حق عرب الغرض منه توصيل فكرة إن المخدرات قادرة تكسر الراجل وتنزله من سابع سما لسابع أرض وتبقى عامل زي خيال المآتة، وبقدم رسالة للشباب اوعى وطريق المخدرات مفيش حاجة هتكسرك غير دا ولا حاجة هتضعفك وتهينك وتهز هيبتك غير المخدرات".