جميلة عزيز: الفن ضيع عمري.. وخطيبي تخلى عني فترة مرضي

أوضحت الفنانة جميلة عزيز، أن الفن جعلها تخسر فرصة الزواج وتكوين الأسرة، بجانب الكشف عن أمنيتها في الحج، وذلك خلال لقاء لها ببرنامج "المنسي" المذاع عبر شاشة قناة "هي".

جميلة عزيز: الفن ضيع عمري

وقالت جميلة عزيز في تصريحاتها التي يرصدها موقع تحيا مصر: الفن ضيع من عمري وضيع عليا أني اعمل بيت وأسرة، وأنا مش ندمانة ده نصيب من عند ربنا، البني آدم لو مكتوب له أنه يرتبط ويتجوز ويعمل أسرة يبقى هيحصل سواء في الوسط أو برا الوسط، يمكن مكتوب لي عند ربنا أو مكتوبلي يوم القيامة أني ارتبط بملاك، أصل اللي متجوزش في الدنيا هيتجوز في الآخرة أكيد.

جميلة عزيز: نفسي أحج

وتابعت: أي حاجة بتيجي للبني آدم بتكون تجربة وبتكون خير له، ربنا مبيسببش حاجة للبني آدم غير لما تكون خير لما بعد ذلك، وعايز يخليني في مرتبة أعلى.

وعن أمنيتها، فقالت جميلة عزيز: اللي شاغل بالي أني أحج، نفسي أوي أحج وربنا يكتبلي أحج وأزور بيته وأصلي وأدعي هناك، مشتاقة جدًا وربنا يكتبها ليا ولكل مشتاق، ونفسي الناس تحب بعضها بإخلاص من قلبها بدون نفاق ومصلحة.

مسلسل العتاولة الحلقة 20.. محاولة قتل عيسى الوزان

مسلسل خالد نور وولده نور خالد الحلقة 5.. مفاجأة جديد تصدم كريم محمود عبد العزيز

جميلة عزيز: خطيبي تخلى عني فترة مرضي

وفي الحلقة ذاتها، كشفت الفنانة جميلة عزيز، عن تخلي خطيبها عنها أثناء فترة مرضها، مؤكدة أنها تعلمت من التجربة وراضية تمامًا عن نصيبها.

وقالت: خطيبي تخلى عني ومسألش عليا فترة مرضي، لقيته أختفى وسافر ومبقاش له وجود خالص في حياتي، ودي من الحاجات اللي أثرت فيا نفسيًا جدًا، أنا مريت بحاجات صعبة جدًا في فترة تعبي، كأن ربنا كان عايز ينور بصيرتي أن ده شخص وحش، ويمكن المرض ده جالي علشان أبعد عن أشخاص معينة وأفوق لأني كنت مرتبطة بيهم جدًا.

وتابعت: اتخطبنا حوالي 3 سنين، وشوية شوية كان بيختفي، لدرجة أني كنت تعبانة جدًا ومردش عليا، وهو مكنش يعرف عني أي حاجة أنا حية ولا ميتة لغاية دلوقتي، ولغاية دلوقتي محاولش يعرف عني حاجة، وكان بيقولي أنا مش هبعد عنك إلا لو موت، لو كان هو حصله كده كنت انا عملت كده؟ استحالة أنا عندي أصل، ده لو مربية قطة في البيت وتعبت مش هترميها في الشارع وهتعالجيها، منه لله وربنا يسامحه.