مؤلف يتهم صناع مسلسل خالد نور وولده نور خالد بسرقة فكرة العمل منه| تفاصيل

اتهم المؤلف حاتم حسين صناع مسلسل خالد نور وولده نور خالد بسرقة فكرة العمل منه، وذلك من خلال منشور عبر حسابه الشخصي على موقع التواصل الاجتماعي فيسبوك.

حاتم حسين يتهم صناع مسلسل خالد نور وولده نور خالد

وكتب حاتم حسين في تصريحاته التي يرصدها موقع تحيا مصر: طيب يا جماعة مسلسل خالد نور وولده نور خالد فكرته الأساسية أب وابنه في نفس السن بيخوضوا رحلة مسروقة من مسلسل كنت عامله وبعدها اتحول لفيلم المسلسل كفكرة طلع لأحمد أمين وأكرم حسني وبعت لأمين المعالجة ببريزنتيشن أحمد أمين بكل إحترام قاللي رأيه وتخوفاته من الفكرة (ممكن أمين يشهد على ده).

وتابع: بعدها للأستاذ طارق الجنايني عجبته الفكرة وشاف نحولها لفيلم وفعلا اشتغلت على معالجة الفكرة وتحويلها لفيلم بعدها طارق الجنايني انشغل والموضوع نام ( فيه ايميلات بالمعالجة مبعوتة)
المهم الفكرة فضلت موجودة لحد ما بدأت اشتغلها مع نجم كبير (مش هاقول اسمه) وفي وسط الشغل فوجئت ببوستر المسلسل.. ومن الاسم شكيت.. فكلمت شريكي في الكتابة أحمد رشدي عرفت أنه عرض الفكرة على نجم كوميدي (برضه مش هاقول اسمه) فعجبته جدا وتحمسلها وشاف أن أنسب واحد يعملها معاه هو كريم محمود عبد العزيز وفعلا قابل كريم وقاله الفكرة.

حاتم حسين يكشف تفاصيل سرقة فكرته

واضاف: (كريم انبهر بالفكرة لكن ما اظهرش اي إهتمام على حسب رواية النجم اللي باثق في كلامه جدا).. كل ده كنت مش متأكد انها نفس الفكرة.. كلمت مؤلف المسلسل صديقي قلتله عايز أسألك سؤال هل المسلسل بتاعك قصته ان هيكون اب وابنه في نفس السن بيعملوا رحلة ما ( buddy comedy ) odd couple.. قاللي آه، سألته أنت اللي جايب الفكرة ولا نجم أو منتج قالولك احنا معانا فكرة logline عايزين نشتغل عليه قاللي لا أنا اللي جايبها أنا والي بيكتب معايا...فأنا صدقته.

مسلسل خالد نور وولده نور خالد الحلقة 4.. إثبات أبوة كريم محمود عبد العزيز لشيكو

مسلسل خالد نور وولده نور خالد الحلقة 3.. شيكو يطالب كريم محمود عبد العزيز بإجراء تحليل DNA

واستطرد: بس بعد كده هو قال للنجم ده ان شيكو هو اللي جاب الفكرة(وده عكس اللي قالهولي)، وأنا عاذره لأنه ممكن يبقى مش عايز يلبس حد.. بس هي دي الحكاية.. هتقولولي مسجل هاقولكو اه الفكرة بس أن اللي بيحصل أنك بتحور الفكرة وتخلق مبررات تانية وشخصيات تانية بس بتبقى حرقت أكتر عنصر جذاب في الحكاية( اب وابنه في نفس السن بيخوضوا رحلة بين الماضي والحاضر )، وفي الاخر هتبقى مش نفس الفكرة ويتقال أصلها اتعملت ميت مرة في أفلام كذا وكذا وتوارد خواطر وكل الكلام الجميل ده.

حاتم حسين: مستعد لمواجهة فريق عمل مسلسل خالد نور وولده نور خالد

واختتم: عامل البوست ده ليه.. عشان لازم يبقى فيه طريقة تحفظ الحقوق والافكار من سرقة الممثلين والمنتجين اللي بيعتبروا الفكرة يعني حاجة بسيطة.. وعشان احنا كمؤلفين بنبيع افكار وبعدين نكتبها لما نتفق عليها مش كل ما هتجيلي فكرة هكتبها فيلم ولا مسلسل قبل ما اعرضها على حد.. وتاني اللي بيسرق بيسرق سطر واحد ويعمله بطريقته وبيعتبر ده صياعة أكيد متضايق شوية لأن الفكرة دي كنت بحبها جدا وكنت محضرلها حاجات حلوة وكنت هاعملها مع كوميديان كبير باحبه وبقالنا كتير عايزين نشتغل مع بعض ..ومتضايق لأنها مش أول مرة تحصل معايا.. ملحوظة مستعد لأي مواجهة مع أي حد من صناع العمل.. تعديل الفكرة موجودة عندي من شهر ٨ / ٢٠٢١.