أحمد حلمي يكشف سر خواتمه الثلاثة وخناقته مع منى زكي

كشف الفنان أحمد حلمي، سر الـ 3 خواتم التي يرتديها ويظهر بها طول الوقت، وخلافاته التي تحدث مع زوجته الفنانة منى زكي وكيفية حلها.

أحمد حلمي: اول حب في حياتي كانت خالة صاحبي

أحمد حلمي: علاء ولي الدين اتخطف بدري وكان صوفي

حكاية خواتم أحمد حلمي

وأضاف أحمد حلمي خلال لقائه ببرنامج "بودكاست BIGTIME" الذي يقدمه الإعلامي عمرو أديب: "أول خاتم لونه أسود جبته من إيطاليا على شكل جمجمة، والخاتم الثاني به قطعة من كسوة الكعبة، والثالث خاتم أخويا الله يرحمه".

وتابع أحمد حلمي: "أنا بحب الخواتم وأخويا الله يرحمه كان بيلبس خاتم ما بيقلعهوش فأنا أخدته ومكتوب عليه بسم الله الرحمن الرحيم". 

دبلة أحمد حلمي ومنى زكي

ولفت أحمد حلمي: "لست من أنصار لبس الدبلة لإن بقعد أقلعها في التصوير وتقع وتضيع بس هي عندي معلقها وبلبسها أحيانًا في رقبتي، وبعدين معروفة إني متجوز يعني ههرب من إيه، وعلى فكرة منى زكي كمان ومنى كمان مش لابسة دبلة برضو بس الدبلتين موجودين".

شكل خلاف أحمد حلمي ومنى زكي

وعن شكل الخلاف والشجار بينه وبين منى زكي، كشف أحمد حلمي، قائلًا: "بقيت أخلص الخناقات على طول والأول كانت الخناقة بتقعد كتير وتوصل لـ4 أيام والجو يبقى متنشن وبعدين نتصالح في اليوم الخامس".

وتابع: "بعد خناقاتنا أنا ومنى زكي بيبقى الأكل موجود ونقعد ونتفرج على التليفزيون واحنا متخانقين والخناقة في إننا مش بناخد وندي في المكان، ويعني نفترض بعد الخناقة لقيت منى قاعدة أقولها أنتِ بتتفرجي على حاجة تقول لأ، فأقولها طيب تحبي تتفرجي على حاجة ترد اللي أنت عايزه، هما ينقطوا بس أنا كمان بنقط، وفي نص الفيلم الاقيها قامت تنام من غير ما تقول تصبح على خير".

وأكمل: "شكل خلافنا أنا ومنى زكي اختلف دلوقتي أنا الخناقة ما بقتش تطول وبعدين بنتصالح على طول، واحيانا بحس إني ببقي غلطان لإني ممكن أكون ما قدرتش الوقت اللي بتخانق فيه".

وقال أحمد حلمي : «أول قصة حب في حياتي كانت خالة واحد صحبي، كانت تقريبا خواجاية جميلة أوي وقمر، كنت وقتها عندي 8 سنين تقريبًا».

وتابع أحمد حلمي: «الحب اللى بجد قبل منى كان في مرحلة الدراسة في فترة إعدادي، وحبيت في بنها لما كنت بنزل إجازات من السعودية إلى بنها، وكان ليا قصص حب في المصيف».

واستكمل أحمد حلمي: «حبيت بنت الجيران ومن منطقتي في بنها، وأنا في ثانوي، ودي القصة اللى كانت بجد شوية».