بيتر ميمي للجمهور: شوية شوية هتفهموا مسلسل الحشاشين.. والعمل مش وثيقة تاريخية

حرص المخرج بيتر ميمي الرد على تعليقات الجمهور حول مسلسل الحشاشين منذ طرح حلقته الأولى، وذلك من خلال منشور عبر حسابه الشخصي على موقع التواصل الاجتماعي فيسبوك.

بيتر ميمي يرد على تعليقات الجمهور حول مسلسل الحشاشين

وكتب بيتر ميمي في منشوره الذي يرصده موقع تحيا مصر: طيب كل سنة وأنتم طيبين.. مع أني مكنتش حابب اتكلم علشان دول كلهم ٤ حلقات.. مبدأيا المسلسل من وحي التاريخ وده مكتوب نصا في التترات يعني مش وثيقة تاريخية لكنه دراما تاريخية.. هو المخرج العالمي تارنتينو لما قتل هتلر فى السينما كان حقيقة؟ أو نابليون في فيلم ريدلى سكوت الاخير هل ده نابليون اللي في كتب التاريخ؟ ديه دراما تاريخية.. حاولنا نعمل خيال لفترة من الفترات لكن في شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية.

بيتر ميمي: مفيش كتاب اتفق على حسن الصباح

وتابع بيتر ميمي: هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وافكاره والموجود اجتهاد… ماركو بولو أو فلادمير بارتول أو برنارد لويس أو فرهاد دفترى.. وكتير جدا.. حسن الصباح كان بيعمل معجزات؟ لا طبعا!!! و ده تباعاً مع الحلقات هيتفهم.

واردف: الحشاشين مسلسل تاريخي بالعامية المصرية.. الأحداث بين اتراك وفرس.. لما عملوه الاتراك اتكلموا تركي ولما عملوه الامريكان بيتكلموا انجليزى.. احنا عاملينه في مصر والترجمة موجودة في كل بلد.. المسلسل بيتعرض في روسيا وامريكا وأكتر من بلد كل بلد بلغتها.. هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية.

بيتر ميمي: حسن الصباح شخصية فذة وغريبة

واضاف بيتر ميمي: ليه حسن الصباح؟ حسن الصباح شخصية فذة و غريبة ومستفذة أنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم.. أو على مستوانا المصري خط الصعيد أو سفاح اسكندرية.

قنوات عرض مسلسل الحشاشين بطولة كريم عبد العزيز

خالد يوسف يرد على منتقدي مسلسل الحشاشين: الرسول نفسه لم يتحدث باللغة العربية الفصحى

واستكمل: حاجات صغيرة، أم الخليفة رصد كانت نوبية الأصل.. اسكندرية مدينة في مصر لأن في مدن كتير باسم اسكندرية حوالين العالم.. لزم التوضيح للترجمة لأن فيه غير مصريين بيتفرجوا على المسلسل.. مجاعة القاهرة الفاطمية مثبوتة تاريخيا لكن تعددت أشكالها حسب المصادر وهى على فكرة كانت قبل وصول حسن بفترة مش بعيدة بس ديه دراما (من وحي التاريخ).

بيتر ميمي للجمهور: شوية شوية هتفهموا مسلسل الحشاشين

واستطرد بيتر ميمي: ما تسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة ٨.. عم ملك شاه اتقتل بوتر القوس لأن ده كان عرف وتقليد.. مين الست اللي بتظهر لحسن الصباح؟ ده فى حلقة ٣٠ بقى لو ربنا ادانا عمر.

واختتم بيتر ميمي قائلاً: كل سنة وأنتم طيبين وسعيد أن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللي احنا عاملينه.. و مع الوقت ننافس.