هلا رشدي: مش بركز في الانتقادات اللي بتتكتب عني واي بني آدم بيغلط لازم مندلهوش أكبر من حجمه| خاص
ADVERTISEMENT
فتحت الفنانة والمطربة هلا رشدي قلبها لموقع تحيا مصر على هامش إحدى حفلاتها الغنائية في ساقية الصاوي، وكشفت في هذا اللقاء العديد من التصريحات والحكايات الخاصة بحبها لساقية الصاوي وقصتها مع الأغاني وأيضا علاقتها بنجلها معز.
هلا رشدي: بحب مسارح ساقية الصاوي روحها حلوة
كشفت هلا رشدي لموقع تحيا مصر عن سر حبها لإحياء حفلات غنائية في ساقية الصاوي، حيث قالت: أنا بحب المسارح اللي روحها حلوة، والساقية دايما روحها جميلة وأما بحب أحضر حفلة في الساقية بستنى البرنامج اللي هيكون فيها عشان احضرلها، بحس مسارحها دفا اكتر من المسارح الكبيرة أوي دي.
وعن تفاصيل أغنية لمة وفوانيس، قالت هلا رشدي: لمة وفوانيس كانت أغنية اتبعتتلي على الواتساب وأنا عندي شعراء كتير بيبعتولي كلمات على الواتساب وأنا مش بكون عرفاهم بس انا بسمع كل حاجة لحد ما سمعت الأغنية دي كان محمود صالح بيدندنها، فقولتله أنا زي الفل كدة أنا هاخد دي سجلت وصورت وخلاص، وبهتم أن الكلام يبقى حلو وليه معنى واللحن يمسك في الودن.
هلا رشدي: مش بركز مع الكلام اللي بيتكتب عني ولازم منديش الموضوع ده أهمية
وتطرقت هلا رشدي في لقاءها بالحديث عن تعاملها مع الانتقادات، حيث قالت: الانتقادات كلها بتزعل الا النقد البناء لكن أنا مش بركز للكلام اللي بيتكتب نهائي واي بني آدم بيكتب تعليق مش قد كدة أو بيغلط بالنسبالي بني ادم مش سوي، فلازم مندلهوش حجم اكبر من حجمه عشان يبقى طول الوقت خايف ومستخبي ورا الكيبورد.
وعن أعمالها المقبلة، قالت هلا رشدي: بعمل فيلم مع محمد مهران وسوسن بدر وصلاح عبدالله وبسمة وصبري عبد المنعم ومجموعة من الشباب.
أما عن علاقتها بنجلها معز، فقالت: بحب دايما اكون صديقة معز نرغي ونلعب مع بعض وفي نفس الوقت يكون عارف حدوده معايا.
هلا رشدي في مسلسل مكتوب عليا
يذكر، أنه ذاع صيت هلا رشدي في عالم التمثيل من خلال مسلسل مكتوب عليا والذي خاضت بطولته إلى جانب الفنان أكرم حسني والفنان عمرو عبد الجليل وكلا من أيتن عامر، الفنانة القديرة حنان سليمان، وإسماعيل فرغلي، ومحمد طعيمة، وغيرهم من نجوم الفن، وحقق نجاحات كبيرة خلال فترة عرضه في السباق الرمضاني لعام 2021.
جوجل نيوز
تطبيق نبض
