عبد الرحيم كمال: مفيش حاجه اسمها كاتب صوفي والحشاشين في رمضان 2024 بيتكلم عن شخصية مرعبة |حوار

كشف الكاتب والسيناريست عبد الرحيم كمال عن تفاصيل مسلسله الجديد الذي يحمل اسم الحشاشين والمقرر عرضه في السباق الرمضاني المقبل 2024، وتحدث عن رواياته الجديدة في معرض الكتاب، حيث حرص تحيا مصر على إجراء حوار معه خلال السطور التالية.

هل تصنف نفسك ككاتب صوفي؟

مفيش حاجه اسمها كاتب صوفي..أنا إنسان بيحب الناس المتصوفه وبكتب في المحبة وفكرة التصنيف دي مشغول بيها ناس ملهمش في الفن.

وماذا عن رواياتك الجديدة بمعرض الكتاب؟

3 كتب.. مصر الحال والأحول مجموعة مقالات كتبت على مدار 12 سنة، موت العالم وكل الألعاب للتسلية.. متكتبوش في وقت واحد ولكن اتكتبوا على مدار سنين وشاء ربنا أنهم ينشروا في وقت واحد بمعرض الكتاب.

هل تعمدت نشر رواياتك الجديدة الثلاثة في نفس الوقت بمعرض الكتاب؟

لا والله دي صدفة ومشيئة ربنا وأنا معترضتش عليها مع أن كله كان بيقولي ليه التلاته ينزلوا في نفس الوقت.

حدثنا عن التنوع بين رواياتك الجديدة؟

جامعين بين الثقافة والفن والاقتصاد والتصوف والسياسة والاجتماع.

ما هي الرواية الأقرب لقلبك؟

كل كتاب أنت بتكتبه وكل حرف بيبقى حرك قلبك واداله جزء من المتعة والألم والتعب والسهر والتسلية والسعادة.. فمفيش حاجة أقرب أو أبعد.

نلاحظ أن معظم كتبك باللغة العربية الفصحى.. فعلى أي أساس تكتبت بالعامية أو الفصحى؟

كل كتبي باللغة العربية الفصحى ما عدا كل الألعاب للتسلية، فالموضوع والزمن والعصر هو اللي بيفرض عليك الطريقة اللي هتكتب بيها.

تشارك في السباق الرمضاني 2024 بمسلسل الحشاشين.. فما هي قصته؟

مسلسل الحشاشين 2024 من بطولة كريم عبد العزيز وكوكبة من النجوم والنجمات إخراج الدكتور بيتر ميمي، وبيتكلم عن فترة تاريخية من 1000 سنة وعن شخصية مرعبة وغريبة وهي شخصية حسن الصباح.

على الصعيد الآخر، كان كتب عبد الرحيم كمال عبر حسابه الرسمي بموقع التواصل الاجتماعي فيسبوك: الناس متهيألها إنها بتروح لربنا لما بتموت،ما هو موجود من قبل ومن بعد، وقريب من قبل ومن بعد، وأنت عنده من قبل ومن بعد، الفرق بس أنك على قد معرفتك بقربه هنا 
على قد معرفتك بقربه هناك.

وتابع عبد الرحيم كمال: فحاول تعرف وتحب، لانك  لا تعرف تروح ولا تيجي أصلا، أنت مين أصلا عشان تروح لربنا، إذا معرفتش تشوف قربه وأنت حي، هتفضل برضه كده وأنت ميت، لأن استشعار القرب حياة.. فحاول تعيش  بقربه وأنت حي الأول، عشان تلاقي نفسك حي برضه بقربه، وأنت في عالم البرزخ قربك نعيم الروح.