مذيعة رفضت ظهوري في برنامجها عشان معنديش فضايح.. أبرز تصريحات شاهيناز

تحدثت المطربة شاهيناز، عن تفاصيل بداياتها الفنية ودخولها برنامج ستار ميكر لاكتشاف مواهب الغناء وكواليس أغنيتها الشهيرة قولي قولي، فضلًا عن رفض مذيعة ظهورها في برنامجها في تصريحات يرصدها تحيا مصر.

تصريحات شاهيناز 

وقالت شاهيناز في لقاء مع الإعلامية إنجي هشام، في برنامج "المنسي"، المذاع عبر شاشة قناة "هي": أنا اتربيت في بيت كله فن، بابا الله يرحمه كان بيعزف عود وهو اللي اكتشف موهبتي وأنا مكنتش عارفة ولا حاسة أن صوتي حلو، وأول ما اكتشف قدملي في كورال الأطفال بتاع دار الأوبرا اللي كان مؤسسه المايسترو سليم سحاب، واتقبلت في الاختبارات وحضرت حفلات وكنا بنغني أغاني تراثية، وبدأت المشوار.

وتابعت، لما درست موسيقى كنا عاملين فرقة أنا وأصحابي وأي فرصة تيجي نغني فيها والناس تشوفنا كنا بنروح، زي حفلات في فنادق وأعياد الميلاد، وفي يوم وأنا قاعدة بتفرج على التليفزيون لاقيت برنامج بيغنوا فيه ولجنة تحكيم وأمير كرارة بيقدمه، وأنا وإيساف أصدقاء من قبل ستار ميكر فكلمته وقولتله على اللي شوفته، قالي ده برنامج ستار ميكر وأمير كرارة صاحبي، وروحنا قدمنا.

كواليس مشاركة شاهيناز في ستار ميكر

وأضافت، أنا كنت آخر متسابق قدم في الموسم الأول، وحظي كان حلو لأن المنتج طارق نور كان موجود وشافني وسمعني وخلاني غنيت أغنية لحن يوناني بولي بولي اللي هي قولي قولي، وقالولي لو عرفتي تغنيها ممكن تكسبي المسابقة دي لأن صوتك يجيبها، وأنا من أول ما سمعتها خطفت قلبي، وتفاجأت من دكتور أحمد الجبالي الموزع قالي كل البنات اللي دخلوا المسابقة دي سمعوا الأغنية ورفضوا ياخدوها.

واستطردت، في مذيعة من الموجودين حاليًا رفضت ظهوري في برنامج لأني غيرة مثيرة للجدل، وأنا عرفت بالصدفة، أن هي قالت أن حياتي هادية ومفيش فيها فضائح، وأنا ماليش الحق أطلع أهاجم حد عنده وجة نظر مختلفة عني.

شاهيناز تكشف عن قرار ندمت عليه

وأردفت، مقدرش أقول أن في قرار ندمت عليه، لأن شعور الذنب بالنسبة ليا شعور سلبي وأنا مبديش نفسي فرصة إني أعيشه، ولكن أقدر أقول أن أي حاجة حصلت في الحياة أنا محبتهاش أوي كان قرار اتعلم منه، ولكن مبندمش بعتبره درس وعلامة وإشارة.

واستكملت، نفسي الجمهور يبدأ يسمع تاني أغاني حلوة، خلاص إحنا سمعنا كتير هبد ورزع، في معاني في الكلام بقت مفقودة دلوقتي ياريت نرجع نسمعها، إدوا فرصة للناس اللي بتعرف تغني وتقدم فن أنها تبقى موجودة.

شاهيناز: المساكنة نوع من أنواع الزنا وإعلامية لغت حلقتها معايا عشان معنديش فضيحة

شاهيناز: الحجاب مبعدنيش عن الفن وأنا ضد الإسفاف

جدير بالذكر، أن برنامج المنسي، من تقديم الإعلامية إنجي هشام على شاشة قنا هي، ويُعرض يومي السبت والأحد من كل أسبوع في تمام الساعة الحادية عشر مساءا، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.