فتوح أحمد: أنا أقل جيلي أجرا ومش بهتم في اللوكيشن غير بالبريك

تحدث الفنان فتوح أحمد، عن حالة العشق التي يعيشها مع الفن، مؤكدا أنه لا يهتم بالأجر الذي يحصل عليه ولا يهتم بالحصول علي أدوار البطولة وإنما يعيش الدور ويتقمصه من أجل المتعة الشخصية، قائلا: "انا اقل جيلي اجرا وبيضحكوا علية في الاجر ومش بهتم في اللوكيشن غير بالبريك اللي اطلبه لازم يتجاب وعلشان تبقوا عارفين مش باكل الا سمك".

مستني الموت

وأضاف خلال استضافته ببرنامج الستات، المذاع علي قناة النهار، أنه شعر بالتشاؤم من مسلسل ذئاب الجبل بعد موت خمسة فنانين خلال تصويره، موضحا أنه  لا يخشى الموت وينتظره في كل لحظة، قائلا :"هخاف من الموت ليه ده كل الناس الحلوة ماتت امي وابويا واخواتي اعز اصحابي كل اللي بحبهم ماتوا .. أنا مستني الموت في كل لحظة بس نفسي اطمن علي فرح بنتي الأول".

واستكمل حديثه عن الموت، قائلا: "بستغرب جدا الناس اللي بيشتغلوا في النقابات وبيدوروا علي مصالح شخصية زي رفع اجرهم او اخذ مسلسل مع ان دي فرصة حلوة جدا علشان يكسبوا ثواب قضاء حوائج الناس .. بيفكروا في الدنيا مش الاخرة".

شائعات الموت

وعلق علي شائعات الموت التي تطول الفنانين بصفة دائمة، والتي طالته في وقت سابق، قائلا: "بجد ناس مزعجة .. وبستغرب لما يكون شيخ بدقن ويهاجم فنان علشان راح مهرجان في بلد شيعي ومش بيتكلم لما يروح مهرجان في اليونان مع انه بلد مش مسلم ..ده فن ملوش علاقة بالدين.. وبعدين يطلع شائعة اني توفيت بجد عيب .. زمان لما كنت بشوف شيخ بدقن كنت بقوم اقف احتراما لكن دلوقتي لما بشوف حد بدقن بخاف".

خريج المعهد لقيط

وطالب “فتوح”،  بضروروة توفير فرص عمل لشباب الخريجين من المعهد العالي للفنون المسرحية ومعهد السينما حتى لا تضيع اعمارهم في محاولة الظهور علي الشاشة، قائلا: "انا بعتبر خريج المعهد ده زي اللقيط اللي بيتحط علي باب جامع لو قابله شيخ هيبقى صالح ولو قابله حرامي هيبهدله .. خريج المعهد برضوا بيبقى ماشي ممكن يقابل مخرج يكتشفه وينقله ناقلة تانية وممكن لا".

يذكر أن برنامج الستات، من تقديم الإعلامية مفيدة شيحة والإعلامية سهير جودة، ويذاع من السبت إلي الأربعاء في تمام الساعة الثالثة عصرا علي قناة النهار الفضائية، ويناقش هذا البرنامج قضايا ومشكلات المجتمع بالإضافة إلي فقرة خاصة بالطبخ.

ويعد هذا البرنامج هو التعاون الثاني بين الإعلامية مفيدة شيحة والإعلامية سهير جودة بعدما قدما سويا برنامج "الستات ميعرفوش يكدبوا" مع منى عبدالغني علي شاشة CBC.