حسن شاكوش عن اعتزاله: دي حاجة بتاعة ربنا واي حد يتمنى يبقى مكاني

خرج مطرب المهرجان الشعبية حسن شاكوش ليكشف عن نيته في اعتزال الغناء، مشيرا إلى أن الهداية أمر يتدخل فيه الله لكنه لا يرى أنه يعمل في مهنة غير صحيحة وأن معظم الشباب تتمنى أن تكون مكانه وتحقق النجاحات الذي حققها في هذه العمر.

تحيا مصر 

حسن شاكوش عن إمكانية اعتزاله: الهدى ده بتاع ربنا 

وقال حسن شاكوش في لايف عبر حسابه الرسمي بموقع تبادل الصور والفيديوهات انستجرام: الهدى ديه حاجة بتاعت ربنا وأنا مبعملش حاجة غلط وأي شاب في الدنيا يتمنى شغلتي، وأحسن ما أبيع مخدرات، الله أعلم بظروف اللي بيبيع مخدرات أو وراه إيه من مسئوليات أو ديون إيه، العذر لكل أخواتي الشباب.

وتابع حديثه، قائلا: لو أنت مكاني هتقول أنا عايز أغني وعايز الشهرة دي، أنا اجتهدت وتعبت ومتعرفش أنا تعبت ازاي عشان أوصل للي أنا فيه، وأنا موصلتش لحاجة أنا في الأول، لسه المشوار قدامي طويل وعملت نجاح محدش عمله ولا هيعمله، أي حد بيتريق على الغناء يتمنى يبقى مكاني.

حسن شاكوش عن غنائه المهرجانات: أنا مميز في الحتة دي 

وعن غنائه للمهرجانات، قال حسن شاكوش: أنا مميز في الحتة ديه وأنا لما بغني بحب أني أكون متفاعل مع الجمهور بتاعي وفيه ناس من الجمهور بيحبوا رقصي، والواحد مش بيلبس بدلة رقص ويطلع يغني وربنا يخليلنا الناس اللي في ضهرنا ويحبونا واللي بيكرهنا بيقولنا ربنا يهديكم ويصلح حالكم لأننا وصلنا لمرحلة إن 95% مننا أننا بنكره الخير لأي حد ناجح حتى لو راجل بتاع ورنيش هنلاقي ليه أعداء، مفيش مطرب كل الناس بتحبه، ولكن الحمد لله اللي بيحبوني أكتر من اللي بيكرهوني، واللي بيكرهوني لما بيقابلوني في الشارع بيتصوروا معايا، هو ممكن يكون بيشتم من الغل وغيران من نجاحي وإن ربنا كرمني وإني أحسن منه.

حسن شاكوش: أنا فاتح 60 بيت لو مشتغلتش مش هيلاقوا ياكلوا 

واختتم حسن شاكوش حديثه: أنا ورايا التزامات، ومعايا أخواتي وأهلي حوالي 5 أو 6 بيوت وفرقتي حوالي 40 فرد واللي شغالين معايا حوالي 7 أشخاص، ولو أنا قعدت في البيت الـ 50 أو 60 بيت دول مش هيلاقوا يأكلوا ومتعلقين بعد ربنا بيا أنا.