مروة عيد عن صوت وصورة: تعرضت للتحرش اللفظي.. وقصة رضوى لمستني وخلتني أتعاطف معها

شاركت الفنانة مروة عيد في مسلسل صوت وصورة للفنانة حنان مطاوع، الذي يعرض حاليًا عبر منصة Watch it وقناة DMC، وتقدم مروة عيد شخصية لبنى، وعبرت عن سعادتها بردود أفعال الجمهور على المسلسل وبشخصيتها، حيث أن المسلسل قد تصدر التريند منذ عرض أولى حلقاته.

تحيا مصر يرصد لكم أبرز تصريحات مروة عيد عن شخصيتها في مسلسل صوت وصورة لـ حنان مطاوع ورأيها في ردود أفعال الجمهور بعد عرض المسلسل

مروة عيد: مبسوطة جدًا ومكنتش متوقعة رد فعل الناس والنقاد

وعبرت مروة عيد عن سعادتها بردود أفعال الجمهور عن شخصيتها  في مسلسل صوت وصورة من خلال بيان صحفي أصدرته، وقالت: "مكنتش متوقعة رد فعل الناس والنقاد عليا، ومبسوطة جدًا من ردود الأفعال على شخصية لبنى وعلى المسلسل"، وأبدت إعجابها بدور حنان مطاوع وقالت: "سعيدة بشخصية رضوى اللي بتعملها الفنانة العظيمة العبقرية حنان مطاوع اللي بجد مش شايفة حد في موهبتها، وهي أصلح حد للدور ده".

وكشفت مروة عيد عن أصعب مشاهدها في مسلسل صوت وصورة وقالت: "أصعب مشاهدي كانت مقابلة لبنى مع طليقها لطفي، بعد ما بعت رسالة اعتذار عن اللي عمله معاها، وأنه عايز يرجع لها، لكن لبنى بتكتشف أن الرسالة دي اللي كتبها وافي واستخدم الذكاء إلاصطناعي، والصعب أنها كانت ضد الشخصية دي ومش مقتنعة بتصرفاتها". 

ومن جانبها، أكدت مروة عيد أن شخصية لبنى لا تشبهها في الحقيقة، وقالت: "لبنى بعيدة تمامًا عن شخصيتي الحقيقية، لأن أنا في الواقع شبه منطوية، ومش بعرف أتعامل مع الناس وأندمج معاهم بسرعة، وبحتاج وقت عشان أخد عليهم وأكون صداقات معاهم". 

أما عن كواليس مسلسل صوت وصورة، قالت مروة عيد: "كنت سعيدة جدًا أني بتعاون لأول مرة مع الفنان صدقي صخر، وأنا بتنبأ له بمستقبل عظيم، لأنه بيتعامل مع كل شخصية بإحساسه وبيتعايش معاها، وبتمنى أتعاون معه في الأعمال الفنية تانية، لأنه فنان هايل وخطير".

مروة عيد: في حواليا ستات كتيرة شبه لبنى ودي غريزة طبيعية عندهم

وأكدت مروة عيد عن وجود سيدات تشبه شخصيتها لبنى في مسلسل صوت وصورة، وقالت : "في حواليا ستات كتيرة شبه لبنى في اهتمامهم بنفسه بس ومش بيهتموا بأولادهم، ومعظمهم مش بيقفوا بجنب أزواجهم في أزمتهم، وكل طلباتهم عبارة عن فلوس والمظاهر الاجتماعية وبيهملوا العلاقات الإنسانية، الستات اللي بتغفل عن الجوانب الإنسانية دي بتكون غريزة طبيعية عندهم، ومهما كان المستوى الاجتماعي بتاعهم لكن أوضاعهم بتكون متقلبة". 

وعن رأيها في اتخاذ قرار بالانفصال حال حدث خلاف بين الزوجين، قالت مروة عيد: "مش بأيد قرار الانفصال في حال حصل مشاكل بين الطرفين، وخاصة لو عندهم أطفال عشان الأطفال متطلعش غير سوية، أو يكتسبوا صفات سيئة، والمفروض لما يحصل مشاكل بين الطرفين لازم يتكلموا مع بعض، ويحاول أي حد من الطرفين يستوعب الطرف التاني، ويتعاملوا بود وتسامح، وأنا ضد تصرفات الأمهات اللي بعد الانفصال بتحرم أطفالها من والدهم، لأن ده بيسبب عواقب سيئة في المستقبل، كمان الأم اللي بتعمل كده بتعاني من رد فعل أطفالها لما بيكبروا". 

مروة عيد: تعرضت للتحرش اللفظي ونصحت البنات أنها ماتسكتش عن حقها

وكشفت مروة عيد عن تعرضها للتحرش اللفظي، وقالت: "اتعرضت للتحرش اللفظي من سنين، زي ما بتعرض له بنات كتير بشكل يومي، وقصة رضوى لمستني وخلتني أتعاطف معها وتأثرت من مشاهدها، ونصحت البنات اللي بتتعرض للتحرش بأنها متخفش وماتسكتش عن حقها، عشان المتحرش يتعاقب بالشكل اللي يستحقه ومايكررش جرائمه تاني مع أي بنت". 

وتابعت مروة عيد عن قضية التحرش، قائلة: "ممكن نقلل من  ظاهرة التحرش من خلال الوعي بخطورته، وكمان من خلال التعليم الصحيح والتربية السليمة، من الأسرة اللي المفروض بتربي أولادها على القيم والمبادئ والأصول والمفاهيم صحيحة".

مسلسل صوت وصورة

والجدير بالذكر، أن مسلسل صوت وصورة يشارك في بطولته كل من حنان مطاوع، نجلاء بدر، مراد مكرم، وليد فواز، ناردين فرج، عمرو وهبة، ولاء الشريف، محمد كيلاني، صدقي صخر، أحمد ماجد، هاجر عفيفي، أحمد ماجد، إيمان الشريف، مروة عيد، رامي الطمباري، تأليف محمد سليمان عبدالمالك، إنتاج أروما أستديوز للمنتج تامر مرتضى، وإخراج محمد عبدالتواب.