صفاء أبو السعود: بقالي 4 أيام دموعي لا تتوقف بسبب اللي بيحصل والواحد مش قادر يتوقف

أعربت الفنانة صفاء أبو السعود عن شدة حزنها  من الأحداث التي تحدث حاليا في فلسطين مشيرة إلى أنها لا تتوقف عن البكاء من شدة الحزن والتأثر، ليس هذا فقط بل أيضًا من المشاهد المرعبة التي تراها يوميا.

تحيا مصر يرصد في ذلك التقرير تصريحات صفاء أبو السعود عن القضية الفلسطينية

صفاء أبو السعود: بقالي أكتر من 4 دموعي لا تتوقف

وقالت صفاء أبو السعود في مداخلة هاتفية على قناة DMC: بقالي أكتر من 4 أيام دموعي لا تتوقف، لأن النيران في كل مكان ونار الحرب في غمار البحار نفسها وفي والهوا، والأرض كلها ملتهبة بالنيران، وده شيء فوق الاحتمال والواحد مش مصدق اللي بيحصل، لأن مفيش دين من الأديان بيقول حلال قتل الروح اللي المفروض لا تقتل إلا بإذن ربها فإزاي بيقتلوا الأطفال والأرواح.

وأضافت: شيء موجع وفظيع ومدمر للنفس البشرية والواحد مش قادر يستحمل، وأكيد ربنا موجود يحميهم والواحد بيدعي ربنا يسكن الطوفان الفظيع ده حقنا للدماء، لأن القلوب أصبحت أشد قصوة من الصخور وعندهم غفلة وغرور، ولازم القتل يتوقف بأي طريقة.

صفاء أبو السعود : لازم يسمحوا للمعونات تدخل كفايا معندهمش نور ولا ماية

وتابعت مناشدة: لازم يسمحوا للمعونات اللي جات تنقذ ناس معندهمش أكل ولا مياه ولا نور ولا كهرباء ولا شيء، ده شيء يوجع القلب فعلًا أنا مش ببطل بكا من المناظر اللي بشوفها طول الليل والنهار ومش بعرف أنام، وكل يوم بيطلع عليا الصبح بشوف الحاجات دي.

واستكملت: كتر خير مصر والسيسي أنه بعت الدعم ولكنه لم يصل بسبب الحجب والمعوقات اللي منعت دخول الموعنة والدعم، ونتمنى من رؤوساء وملوك العالم يتحدوا علشان يحلوا هذه القضية ونحن لا نملك إلا الدعاء، كل مصر وكل العرب وكل الناس في أنحاء العالم حتى في منطقة اليهود متعاطفين لأن محدش يحب يشوف شخص بيقتل بلا سبب، ودي مش منطقة حروب دي ناس قاعدة في بيوتها

صفاء أبو السعود: كتر خير مصر اللي دخلت تساعد لكن المساعدة ما وصلتش لأصحابها

واختتمت: إزاي يضربوا مستشفى ويموتوا فيها مريض جاي يتعالج لا يستطيع الدفاع عن نفسه ولا يحمي نفسه، ومفيش دين من الأديان يحث على قتل الأبرياء ده شيء قاتل وموجع، وكتر خير مصر وغيرها من الدول اللي دخلت تساعد لكن المساعدة ما وصلتش لأصحابها، حرام قتل الناس أنا منهارة وآسفة مش قادرة أمسك دموعي.