حازم إيهاب لمحمد صلاح: خايف على إيه.. فلسطين بتتحامى فينا

علق الفنان حازم إيهاب على تعليق اللاعب محمد صلاح والذي نشره أمس الأربعاء عبر حساباته الشخصية بالسوشيال ميديا، والذي رآه البعض أنه حيادي ولا يدعم القضية الفلسطينية.

تحيا مصر يرصد لكم تعليق حازم إيهاب على فيديو محمد صلاح. 

حازم إيهاب عن محمد صلاح: هقول اللي جوايا عشان أنا هفرقع بصراحة

نشر حازم إيهاب بث مباشر عبر حسابه الرسمي بموقع تبادل الصور والفيديوهات الإنستجرام، وعبر عن غضبه من محمد صلاح لأنه رأى أن الفيديو حيادي، ولا ينقل الصورة الكامل لمايحدث في قطاع غزة، وقال: "هقول اللي جوايا عشان أنا هفرقع بصراحة، كابتن محمد صلاح أنا بحبه جدًا ومؤمن جدًا بالتجربة اللي طلعت من بلدي برغم كل الصعوبات، اللي وصلت أن العالم كله بقى عارف مين الشخص ده اللي بيلعب في كذا نادي جماهيري عالمي، من أول بازل لحد فيورنتينا روما تشيلسي ليفربول ومنتخب مصر والراجل اللي دخلنا كأس العالم".

واستنكر حازم إيهاب ما قاله محمد صلاح في الفيديو وقال: "لازم تبقى أنت فاهم كويس جدًا أنت مكانك إيه عند الناس، وبقولك كده لأني لو حطيت نفسي مكان شخص حيادي من الأرجنتين أنا معرفش دول ولا ليا فيهم ناس ولا التانين، ولو أنا بتفرج على الفيديو بتاعك أنا استفدت إيه وفتحت الفيديو لاقيت لا لإراقة الدماء وأن الدم حرام وأن لازم الدنيا كلها توقف سؤالي هنا أنا استفدت إيه وفهمت إيه من الفيديو".

حازم إيهاب عن فلسطين: الناس دي بتتحامى فينا إحنا يا محمد

واسترسل حازم إيهاب قائلًا: "أنا دلوقتي لو سمعت الكلمتين دول وفتحت شوفت اللي بيحصل في العالم هلاقي أن دول بيقتلوا وبيدبحوا بيعملوا ده بمنطق، والناس اللي بترد عليهم عندهم منطق مين اللي يخليني أقتنع بحاجة وحاجة لا، هديك مثال تاني هو باسم يوسف عمل إيه وإيه الخطوة اللي خليت العالم كله يتكلم عليه، وأنت عارف مين هو بيرس مورجن موجود على اليوتيوب وآخر مرة شوفتها كانت جايبة 9 مليون مشاهدة، الراجل ده كان بيتكلم بحرقة من جواه ليه وأما كان بيتقال رأي في حاجة معينة مكنش بيقول رأيه بحيادية يا محمد، كان بيقول رأيه اللي المفروض أي بني آدم بيفكر عقلاني صاحب قضية عربي مصري، يا محمد الناس دي بتتحامى فينا إحنا".

وأضاف حازم إيهاب قائلًا: "باسم جمع كل اللي إحنا بنقوله وقاله بالإنجليزي، أنت كان عندك الفرصة على فكرة أنك متتكلمش إنجليزي خالص، بس أيًا كان أنت شخصية عالمية ولازم تتكلم بلغة الناس كلها تفهمك بها وكل ده معنديش معه مشكلة خالص، ولكن الراجل ده طلع وأتكلم ولما كان هو بيرس مورجن بيقاطعه، حاجة معروفة جدًا عن بيرس مورجن لو محدش بيتفرج عليه الراجل ده عايز يقاطعه، ويحترم أنه نزل الفيديو على اليوتيوب معناه أنه راجل حيادي، لكن باسم كانت ردوده كلها واقعية وماسكة طرف بعينه وبيدافع عنه وبحميه، وبتكلم أن هو ده اللي خسران في القضية ده اللي أرضه اللي متاخدة منه ده اللي المستشفيات فيه بتتفجر واللي أهله وأطفاله بيتكتب لهم الشهادة من قبل أصلًا ما يتولدوا أنا كده أفهم".

حازم إيهاب لـ محمد صلاح: أنت مع مين أنت وخايف على إيه

واستنكر ما قاله محمد صلاح وقال: "لكن أنا مكنش عندي أي مشكلة خالص أنك تتقبل فكرة النقد اللي كان بيحصلك، وأبقى أنا من جوايا أبقى فاهم معلومة أنك اتبرعت من خلال الهلال الأحمر لضحايا غزة أو في فلسطين بشكل عام، مش ضد خلاص أنت تقبلت النقد وعندك حاجة تخاف عليها وأنا معرفش هو إيه وده حاجة مستفزاني جدًا، ومكنش عندي أزمة خالص أنك تفضل مكمل في هذه النظرية وتسيب الناس تضرب دماغها في الحيط معنديش أي مشاكل خلاص، أنت أخدت موقف والناس جنبت وشوية شوية والناس هتنساك والاسم أن محمد صلاح اتبرع بفلوس ومش عايز يدخل نفسه في سياسة".

وتابع قائلًا: "خصوصًا على فكرة أنك عمرك ما كنت الشخص ده بالنسبة للوسط، يعني أنت عمرك ما كنت أبو تريكة ولا الشخص اللي بياخد كروت صفرا وبيتوقف عشان هو لابس تيشرتات عشان تعاطفه مع غزة أو فلسطين، عمرك ما كنت الشخص ده خليها على جنب فأنت تمام أنت راجل خايف مستقبلك، إنما أنت الفيديو بتاعك ده مالوش لازمة إيه الفكرة من الفيديو وأنا استفدت إيه بتقول الدم حرام إيه ده يعني إيه أنا مفهمتش أنت مع مين أنت عايز تضمن إيه وتمسك في إيدك مين وخايف على إيه".

حازم إيهاب لـ محمد صلاح: يا راجل ده في قضية وفي ناس بتموت

وهاجم حازم إيهاب محمد صلاح وقال: "كلنا عارفين يا صلاح ولو أنت مش عارفه المعلومة دي فأنا عارف وأي حد في الوسط الرياضي عارف أنت كنت هتروح السعودية السنة دي أو السنة الجاية أو اللي بعدها آخرك، وعندي مشكلة عايز أفهم أنت خايف على إيه مش هتكلم على فلوسك ولا رزقك وربنا يبارك لك ويخليلك عيلتي وبناتك وكل الناس اللي أنت بتحبهم مش بتاعتي بس أنا بتكلم دلوقتي أنت خايف على إيه يا راجل ده في قضية وفي ناس بتموت يا جدع فسؤالي هنا أنت خايف على إيه، وإيه أسوأ حاجة ممكن تحصل لك كمواطن".

واسترسل قائلًا: "قعدت أفكر وأقول يعني إيه طيب يعني هو في عقود بتمنعه يتكلم في ده طيب ما اللاعيبة أتكلمت، وأنت خايف على إيه ما أنت حققت خلاص أنت مش لاعيب عنده 22 سنة في مهارة مارادونا وقدامي لسه المستقبل كبير والواد مهزوز ومش عارف الليلة دي ممكن ترسى على إيه فلا أنا هاخد جنب، أنت حققت خلاص أنت دخلتنا كأس العالم وحققت أرقام محدش حققها في الدوري الإنجليزي وأسطورة ليفربول الحالي".

واختتم البث المباشر قائلًا: "أنت خايف على إيه ومظنش أنك خايف على الفلوس، خايف على شعبيتك ما أنت متقنعنيش برضو هتدفن في الآخر برا يعني ما أنت هتيجي هتدفن هنا أنا مش عارف أقولك أيه وحزين وحاسس أني مضايق والواحد بيفتح الأخبار عمال يشوف حاجات بتسد النفس وساعات الواحد يدمع من الحاجات اللي هو بيشوفها وأطفال بتموت ومستشفيات بتتفجر ده أنت صوتنا أو كنت صوتنا وكنت المعنى بتاعنا بتعرف العالم أن في مصريين محترمين ولا ليهم في الحلاقات الغريبة لا ده واحد ماشي جنب الحيط عنده بنتين ومحدش يسمع عن بيته ومعندوش فضايح أنا مش فاهمك".