جمال سليمان: نفسي أقدم شخصية عالم الاجتماع ابن خلدون .. ومش بفكر في الاعتزال

كشف الفنان جمال سليمان رأيه حول قرار الاعتزال، وعن ما يتمنى أن يقدم، بالإضافة إلى الأعمال التي ندم على تقديمها من خلال لقائه ببرنامج فوشيا في العراق

تحيا مصر يرصد لكم أبرز تصريحات جمال سليمان عن رأيه في الاعتزال وعن الدور الذي يتمنى أن يقدمه وعن الأعمال التي ندم على تقديمها من خلال لقائه ببرنامج فوشيا

جمال سليمان: أتمنى أقدم شخصية ابن خلدون في مسلسل كبير وضخم

وعن تفكيره في الاعتزال حين يقدم عمل يجعله يشعر بالاكتفاء، قال جمال سليمان: "لا أبدًا في شخصيات بتمنى أني أقدمها، ونفسي أعمل عن عالم الاجتماع ابن خلدون هو عظيم ويستحق يتقدم في مسلسل كبير وضخم، وده حاجة من أمنياتي ولكن ماظنش أن ده هيخليني أكتفي وأقرر اعتزل، بالعكس أنا بعد كل عمل بقدمه بحس أني كان ممكن أعمله أحسن من كده وأن العمل الجديد لازم أبذل فيه مجهود أكتر".

وتابع جمال سليمان حديث قائلًا: "بظن أن الجمهور بينتظر مني أقدم شيء بفكر معين ولو حسيت أن مش قادر أقدمه بالشكل ده ولا بالحدود المعقولة، لأن الفنان اللي بيكون محترف لازم يفهم أنه هو جزء من السوق وديناميكياته والإنتاج والمحطات حابة تعرض إيه، والمنتجين حابين يعملوا إيه، والجمهور حابب يشوف إيه، كلها اعتبارات الواحد مايقدرش يتجاهلها وفي النهاية لازم يفكر هو كمان إيه موقعه من الخريطة دي، لما أحس أني ماليش مكان بالخريطة دي، آه ساعتها هفكر أني اعتزل".

جمال سليمان: في أعمال لو كنت أعرف أنها هتكون بالشكل ده مكنتش قدمتها

وكشف جمال سليمان عن الأعمال التي ندم على تقدمها في مشواره الفني وقال: "مش شعور بالندم مش للدرجة دي بس في بعض الأعمال لو كنت عارف أنها هتكون بالشكل ده مكنتش قدمتها يعني لو كنت أعرف أن منتج أو مخرج ما بيشتغل بالطريقة دي مكنتش أشتغلت معه".

وعلل جمال سليمان ذلك قائلًا: "لأن الواحد كان بيعيش أزمات وقتها وظروف صعبة جدًا، وخاصةً إذا كان من نوع الممثلين اللي مش بس جاي يقول دوره ويمشي بصرف النظر عن أي حاجة، وإنسان حازم ولازم يدافع عن العمل كله ده بيخلي الواحد يعيش أزمة حقيقة مع غيره، وأنا عيشت ده واضطريت بس مش بحب أعيشه".

جمال سليمان: لو وافقت على عمل مش مناسب على حساب المشاهد ببقى خجلان

واسترسل جمال سليمان حديثه قائلًا: "عشان كده اتقال عني اني بتدخل فيما ما ليس من اختصاصي، ومش بحب يتقال عني الكلام ده، ومش بعمله لأني غاوي كده، بالعكس أنا بروح على شغلي وكل إنسان عارف شغله بشكل كويس زي ما مطلوب منه بدون ما حد يتدخل، بس أحيانًا بنلاقي نفسنا في ورطة ولو الواحد وافق على حساب المشاهد بيبقى خجلان، أن إزاي هيتعرض العمل ده قدام المشاهد بالطريقة دي فبيضطر يتكلم أو يرفض وطبعًا الأمور مش بتكون زي ما المفروض ولكن بيحصل نوع من التحسين إلى حد ما".

آخر أعمال جمال سليمان الدرامية

ويذكر، أن جمال سليمان شارك في الماراثون الرمضاني الماضي من خلال مسلسل عملة نادرة بالتعاون مع نيللي كريم وهو عبارة عن دراما صعيدية، وناقش المسلسل قضية عدم توريث المرأة في الصعيد.

وشاركهما البطولة كل من جومانا مراد، أحمد عيد، كمال أبو رية، فريدة سيف النصر، ندا موسى، محمد لطفي، على الطيب، مريم الخشت، نهى صالح، محمد فهيم، رمزي العدل، هشام عاشور، وغيرهم، تأليف مدحت العدل، وإنتاج شركة العدل جروب، ومن إخراج ماندو العدل.