رامز أمير عن فلسطين: حد يقنعني لما أخويا يطلب مساعدتي عشان بيقتلوا أولاده أبعت له أكل

عبر الفنان رامز أمير عن حزنه لما تمر به فلسطين دون أن تقف بجانبها الدول العربية، مستنكرًا من الوقفات والمساعدات التي تُقدم، ومتسائلًا كيف بالقوة التي تمتلكها الدول العربية ولا تدافع باستماتة عن فلسطين وعن من يقتلوا كل يوم.

تحيا مصر يرصد لكم تعليق رامز أمير عن موقف الدول العربية من القضية الفلسطينية وعن قرار الوقفات التضامنية معها وتقديم المساعدات

رامز أمير: إحساس القهر والعجز قاتلني حد يقنعني اللي بنعمله هيحرر أهلنا

نشر رامز أمير فيديو يكشف فيه رأيه عن الوضع الراهن فيما يتعلق بالقضية الفلسطينية، واستشهد بفيديو منتشر على السوشيال لطفل يبكي بحرقة ويسأل أين العرب من كل هذا حين استشهدت شقيقته، وعلق على الفيديو قائلًا: "كلمتين لازم أقولهم عشان إحساس القهر والعجز قاتلني، وياريت حد يقنعني إنى غلط عشان استريح من الإحساس البشع اللى أنا حاسه، حد يقنعني أن اللي إحنا بنعمله ده هيحرر أهلنا ويخلصهم من المجازر اللي بتحصلهم بقالهم سنين".

وتضمن الفيديو تعليق رامز أمير عليه وقال: "قبل بس ما أتكلم معاكم عايزكم تتفرجوا كده على فيديو شوفته إمبارح، الفيديو ده أنا شوفته قبل ما أنام على طول أقسم بالله العظيم واللي هحكي ليكم ده اللي حصل، أنا حلمت بكابوس بشع حلمت أن أنا فلسطيني وعمال أهرب كل ما أهرب من الصهاينة أوصل مكان أستخبى فيه وأقف كده أتطمن يلاقوني تاني قعدت أهرب طول الحلم بعد ما بدأت أتطمن في الآخر أني هربت منهم جابوني تاني، عارفين إيه اللي عملته في الآخر عشان أهرب منهم حفرت في الأرض بالرمل ودفنت نفسي".

واسترسل حديثه بكل حزن قائلًا: "أنا جاي أتكلم معكم النهاردة عشان أطلع اللي جوايا أول إمبارح دكتور أشرف زكي نقيب الممثلين بتاعنا اللي كلنا بنكن له كل الاحترام والتقدير نظم يوم عشان نعمل وقفة كلنا كفنانين في مصر بندعم فيها القضية الفلسطينية".

"وطبعًا قولتلهم أني واجب عليا أني أنا أروح بس أنا حسيت إحساس غريب أوي، أنا حاسس إني مكسوف وإن الوقفة مش هتعمل حاجة، أنا عارف أنها مهمة وهتعمل، بس والله العظيم مكسوف من نفسي قدام نفسي قبل ما يكون قدام أي حد".

رامز أمير: أخويا بيقولي ناس دخلت بيته وبتقتل عياله وأنا أعمل وقفة عشان أدعمه

وتابع رامز أمير قائلًا: "الصورة اللي أنا شايفها دلوقتي أن أنا أخويا بيكلمني بيقولي في ناس دخلوا بيته وبيقتلوا عياله وأنا بقوله متقلقش أنا هبعت لك أكل ومياه ومساعدات وهنزل أعمل وقفة عشان أدعمك إزاي يعني.. يعني أخليه قبل ما أولاده يتقتلوا ياكلوا عشان يموتوا وهما شبعانين".

كما استرسل قائلًا رامز أمير: "أنا عارف أن الدولة مش بتاخد قرار بناءً على عواطف والله عارف، بس أنا مابقتش شايف أن الدول العربية ضعيفة يمكن ده كان زمان، قولوا لي لو أنا غلطان الدول العربية دي فيها مصر اللي عندها جيش من أقوى الجيوش في العالم، وفيها المملكة العربية السعودية اللي أنتوا عارفين كويس هي بقيت قوية إزاي دلوقتي وبتقف قدام مين، عندنا الإمارات وقطر والمغرب وتونس والجزائر كل دول اللي يقدروا يعملوه بس أنهم يبعتولهم أكل".

وأنهى حديثه قائلًا: "يمكن أنا مش شايف الصورة كاملة بس أنا مش قادر أشوف غير صورة واحدة وهي صورة الناس اللي بتتقتل إحساس صعب جدًا، أنا مش عارف يمكن أكون غلطان ويمكن تكون العاطفة اللي جوايا وحرقة دمي على المناظر اللي بنشوفها مخلياني أفكر بطريقة إندفاعية شوية بس لو أنا غلطان قولولي حد يقنعني أن أخويا لما يطلب مساعدتي عشان بيقتلوا أولاده أبعت له أكل".

آخر أعمال رامز أمير

والجدير بالذكر، أن آخر أعمال رامز أمير كانت من خلال تعاونه مع الفنان خالد النبوي في مسلسل رسالة الإمام، والذي خاضا به الماراثون الرمضاني الماضي، مع كل من أروى جودة، نضال الشافعي، خالد أنور، وليد فواز، جيهان خليل، حمزة العيلي، أحمد الرافعي، سلمى أبو ضيف، خالد القيش، هافال حمدي، فرح بسيسو، سيناريو وحوار ورشة كتابة للمؤلف محمد هشام عبية، ومن إخراج ليث حجو.