حوار| عمرو القاضي: نفسي أقدم سيرة ذاتية عن الدكتور يحيى المشد.. وسعيد بتجربتي في فيلم الخميس اللي جاي

يستعد الفنان عمرو القاضي لطرح  فيلم الخميس اللي جاي مع الفنان عمرو عبدالجليل المقرر عرضه خلال الفترة القادمة في دور العرضض السينمائية، والتي تدور أحداث حول قصر يلعن سكانه في إطار الرعب الممزوج بالكوميديا، وشاركهما البطولة كل من مي كساب، إسلام إبراهيم، حسام داغر، محمود الليثي، عمرو القاضي، من تأليف ورشة كتابة تضم هيباتيا ونور حمدي ونور مهرجان وعمرو شاهين ومحمد على، ومن إخراج حسن صالح.

واجرى موقع تحيا مصر حوار صحفي مع عمرو القاضي ليكشف لنا عن كواليس فيلم الخميس اللي جاي ودره في الفيلم، بالإضافة إلى شخصية أبو أنس في مسلسل الجماعة بعد التألق الذي أشاد به، وتجربته في المسلسل العالمي Moon Knight، وعلاقته بالمسرح، وإليكم نص الحوار كالآتي:

ما الدور الذي تقدمه في فيلم الخميس اللي جاي مع الفنان عمرو عبدالجليل؟ 

"بعمل دور نصاب بيبع الوهم وهو الوحيد اللي عارف سر الحكاية بيبع لأطراف مختلفة بتنوعتهم وأشكالهم وبطبقاتهم الاجتماعية وثقافتهم المختلفة وبيسيبهم يشتبكوا مع بعض وبعدين بيرجع لهم تاني عشان يعمل عليهم عملية نصب جديدة، الدور محطوط في قالب لطيف جدًا متنوع وفي الآخر الواجد بيكون متحسس ويارب يعجب الجمهور ونبسطهم ونقدر نضحك الناس لأن عشان تضحكي الجمهور المصري ده صعب أوي". 

هل ممكن أن نقدم أدوار الشر في شكل كوميدي مثلما قدمنت شخصيتك في الفيلم؟

"وأنا بتفرج على الزوجة التانية لسعاد حسني لجمال وطبيعة وعالمية الأداء بضحك ومش قادر من جماله وحلاوته واندماجه ومن فطرة الشخصية، أكيد وارد في توقيت آخر لما بتفرج كنت شايف أن العمدة شرير، وفي الآخر أكتر الشخصيات دموية وأكتر الشخصيات شر أنت تقدر تطلع منها كوميديا".

ما السر في اسم الفيلم الخميس اللي جاي؟ وهل له علاقة بالعمل؟

"في أشياء يجب أن تترك المشاهد يعلمها بنفسه، والاسم له علاقة بالفيلم ولازم الاسم يكون له علاقة بالعمل". 

حدثنا عن تجربتك في فيلم الخميس اللي جاي؟

"أنا سعيد بالتجربة دي لأن فيه كتير أوي من أصدقائي وفيه حاجة جديدة بنقدمها وطبيعة السيناريو اللي كنا شغالين عليه جريء وحلو وفعلًا بنقدم فيها حاجة مختلفة وطبية الفانتازي في الكوميديا وكمان الرعب".

ما هي فكرة فيلم الخميس اللي جاي؟

"فكرة الفيلم هي استحضار زمنين فيما بين الماضي بالحاضر وأنا شايف أن ده ولِد موقف مختلف خلانا نقدم عمل فيه مغامرة وجرأة وممكن نسبة الجرافيكس فيه تكون 90%، ولما تقرأ السيناريو بجد الله يكون في عون اللي هيعمل لأنه مليان تفاصيل فنية كتيرة محتاجة الدقة والوقت وشغل".

كيف كانت كواليس فيلم الخميس اللي جاي؟

"كنت مبسوط بالكرو ده أني شغال معه من المخرج والممثلين خلف وأمام الكاميرا وكلنا أسرة واحدة ومتعاونين وبحبهم كلهم، وكنت مبسوط بروح التنافسية الجميلة اللي كانت بينا عشان نطلع أفضل حاجة وتعمل كوميديا جيدة، لأن نجاح العمل من نجاحنا، وفي أخر أحيانًا الصعب اللي بنشوفه في الشغلانة هو المجهود والوقت لكن في الاخر كل ده بيروح مع النتيجة بتاعة العمل وبالنجاح اللي بنشوفه".

ماذا تحضر في الفترة القادمة؟ وماذا تفضل من مدارس الفن؟ وما الشخصية التي تود تقديمها؟

"عندي عملين الفترة اللي جاية سينمائيين وأتمنى التوفيق من الله وبفضل مدرسة الواقعية، وعايز أقدم دور حرامي وضابط يدافع عن وطنه شرير في وقاسي على اللي حواليه وبيصنع الشر". 

شخصية أبو أنس في مسلسل الجماعة كانت دموية ما الفرق بينها وبين دورك في الخميس اللي جاي؟

"دوري أبو أنس مختلف تمامًا عن دوري في الخميس اللي جاي لأن أبو أنس بيقتل بدم بارد ومتطرف تكفيري لكن في الفيلم ده نصاب تعرف تقومه أخلاقيًا لكن القاتل ده مجرم قاتل مجتمعات مش بس أفراد وفكره وذهنه للأسف الشديد شيء قاسي جدًا ومحتاج لدول ومنظمات عشان تحاربه، أما النصاب واحد الشيطان خدعه تقدر تقدمه في شكل كوميدي على عكس أبو أنس إرهابي دموي لأن مش هنسخر من قتل حد".

كلمنا عن تجربتك في دور ابو أنس؟ وكيف رأيت الشخصية؟

"أنا كنت شايف شخصية أبو أنس هادية أوي لأن تفكيري متطرف جدًا بيفكر في القتل بشكل منظم، بيشتغل من خلال جماعات ومجموعات متشابكة ومترابطة زي الشبكة العنكبوتية لها تمويلها، وبالتالي المسالة مش قائمة على الانفعال قد ما قائمة على فكرة أنك شايف ناس بتخطط بشكل سري وفي الضلمة عشان تعرف إزاي تدمر البلاد والعباد زي ما بيقولوا مش في مصر بس أنا بتكلم على العالم كله ".

"وبالتالي كنت شايف الشخصية دائمًا ذكية ودموية بتفكر بدم بارد، بس حتى مهما حتى الشخص ذكي لازم بتيجي لحظة بيقع فيها بس لما اختلفوا على التقسيم قتلوا ابو أنس وده نتيجة الشر".

تألقت في دورك بفيلم فيلم الحاسة السابعة مع أحمد الفيشاوي.. كيف كانت تجربتك؟

"الحاسة السابعة مكنش البداية ليا وكانت في أعمال أخرى ولكن هو من الأعمال المهمة، وسلطت الضوء عليها بشكل أو بآخر ومن الأعمال الناجحة بالنسبة لي وأنا سعيد بها وسايبة لي تاريخ له علاقة بتاريخي الفني متواجد فيها الحاسة السابعة بقوة لأن الفيلم ناجح". 

حدثنا عن علاقتك بالمسرح؟ وما هي علاقة الفنان بالمسرح من وجهة نظرك؟

"المسرح هو الأساس وهو المكون الرئيسي للممثل لأن هو ده اللي علمنا كل حاجة لها علاقة بمهنتا وحبنا للتمثيل وإحنا مرينا بمراحل كتير جدًا أساسها المسرح ولها علاقة بالمسرح العربي والعالمي وكل ده علمنا حاجات وزود شغفنا وحبنا وإيمانا باللي إحنا بنعمله".

"والمسرح هو القدسية الحقيقية بما تقدمه وبيخليك لما تدخل في عالم الاحتراف أو في عالم السينما والتلفزيون بتدخل وأنت عندك اساس مرتكز عليه وبيكون عندك ثوابت حقيقية".

ارتبط اسمك بهوليوود بعد مشاركتك في مسلسل Moon Knight.. كيف رأيت هذه التجربة وماذا أضافت لك؟ 

"الحمدلله ده بفضل ربنا أنه أكرمني بأني عملت مسلسل اسمه Moon Knight كان مع المخرج محمد دياب إنتاج مارفل ديزني، والحقيقة الإحتكاك بهذا العالم وهذا العمل أضاف لي كتير وشوفت عالم تاني، ومهم أننا نحاول نثبت نفسنا في أماكن أخرى على أرض مش أرضنا".

هل الفنان المصري قادر على المشاركة في أعمال عالمية وتكلل بنجاح؟

 "الحمدلله رب العالمين اقدر أقول أننا مش كعمرو لا ككل العناصر اللي مشاركة في المسلسل قدرت أنها تثبت أنه إحنا في مصر التراكم والخبرات اللي اتعلمناها هنا في مصر بلدنا خليتنا قادرين على أننا نقف قدام الصناعة العالمية وإحنا أقوياء وقادرين نثبت نفسنا، والدليل لما خرج الراحل العالمي عمر الشريف خرج من مصر ولما أثبت نفسه في العالم كله كان أساسه مصر وعندنا نماذج كتير جدًا حتى العظيم الراحل أحمد زكي".

إذا أُتيحت لك الفرصة أن تقدم عمل لسيرة ذاتية.. ستكون لمن؟

"السيرة الذاتية أنا من محبيها جدًا ممكن الدكتور يحيى المشد والتاريخ المصري مليء بالشخصيات ومليء بالتاريخ اللي هتبقى محتاج تقدمي شخصيات كتير أوي ومهمة جدًا وتقدم مصر بشكل مختلف وبتقدم تاريخها بشكل مختلف وبنقدر نسمع منها دراما عظيمة، لازم نرجع تاني زي ما أتعمل فيلم وا إسلاماه وقظز بهذه العظمة بالديكور والأزياء بتاعته والحاجات اللي فيه، والتاريخ مليء جدًا وفي الآخر إيه اللي عندك القدرة أنك تقدميه هو ده المهم". 

ما رأيك في الأعمال الفنية التي يتم إعادة تقديمها برؤية معاصرة مثل إمبراطورية ميم؟

"شايف أن التجربة دي فيها شوية مخاطرة مع احترامي طبعا للتجربة وأي تجربة بالنسبة لي هي فيها تعب ومجهود ومحاولة للنجاح، مثلًا في فيلم الزوجة التانية إخراج صلاح أبو سيف بطولة سعاد حسني وصلاح منصور وشكري سرحان وسناء جميل وباقة ضخمة مرعبة رهيبة، عشان نعيد صياغة هذا العمل كمسلسل مرعب لأنك بتتكلمي عن عمل راسخ في وجدان الناس حفظينه، وأنا لسه متفرج عليه من قريب بالصدفة مع والدي دي المرة الكام اللي بنشوفه الـ 18 ولا الـ 20 في حياتي وبتفرج عليه تاني ليه لأن العمل الجيد وشديد الواقعية بتلاقي نفسك عندك استعداد تتفرجي عليه مرة واتنين وعشرة وخمسين على نفس العمل لأن كل مرة بتكتشفي فيها حاجة جديدة وتكتشفي متعة جديدة في المشاهدة عليه ومش بتتشبعي، غير العمل اللي بمجرد السعادة والانبساط اللي بتلاقيها فيه". 

كيف ترى تجربة الذكاء الاصطناعي؟ وهل ستؤثر على مكان الفنان؟

"أي حاجة لها تأثير هل هو تأثير إيجابي أو سلبي الاتنين ممكن بس في الآخر تقدري تقولي أننا منقدرش نستنتج ونقرر إيه اللي هيحصل لأنه في الآخر إحنا شايفين الموضوع من برا لأننا مش جزء من صناعته للأسف الشديد وممكن نكون جزء من صناعته بس قدام، لكن مشكله الذكاء الاصطناعي هيستبدل حاجات كتير جدًا بس أنا شايف دائمًا أن العنصر البشري بيبقى ملموس ومحسوس بيليق بالدراما الإنسانية هنعرف نستبدلها؟ ماظنش".

في النهاية وجه كلمة لجمهور فيلم الخميس اللي جاي؟ 

"أتمنى أننا نكون قدمنا عمل يسعدكم ويبسطكم وأننا نكون قادرين على إسعادكم، وأتمنى بشكل شخصي أنا أكون بقدم لكم أعمال بشكل أفضل احترم في ذهنكم ووجدانكم وأعرف أقدم لكم حاجة تليق بكم، ونفضل طول الوقت بنحاول أننا نعمل حاجة كويسة في ظل توقيت صعب وكل يوم في جديد وكل توقيت له صعوبته، ولكن أتمنى أن إحنا طول الوقت نعمل فن وينافس على المتسوى المحلي والعالمي".

"وأتمنى أن مصر توصل لمناطق أهم لأنها تستاهل أفضل بكتير جدًا من اللحظة اللي هي فيها دلوقتي على كل المستويات، مصر تمتلك الكثير وعندها تراكم ثقافي وفني وأدبي على الأقل قوتها الناعمة، وأتمنى من الدولة تبني مش مجرد مؤسسات ولا دور ثقافة فقط، لا تبني وتفتح الأبواب لأن مصر فيها مواهب كثير جدًا في كل المجالات على جميع المستويات من الدعم للصناعات المتعلقة بالثقافة زي صناعة السينما".

"كل دول العالم بتتنافس أنها تدعم ده وأتمنى مصر أنها تدعم ده بجانب القطاعات الخاصة، لأن دي بضاعة بنصدرها هيفتح مجال لمواهب جديدة، مش عايزين فقط أننا نعتمد على كل ما هو تجاري عشان نقدم، وأتمنى أن ربنا يعطينا القدرة على أننا نقدم ما يناسب خلال الفترة القادمة".