هنا الزاهد: شعري عامل زي شعر علي ربيع وأحمد فهمي بيحبه جدا

تحدثت الفنانة هنا الزاهد عن كواليس خاصة بحياتها الشخصية والفنية، وذلك خلال حلولها ضيفة على برنامج الحكاية والذي يعرض على شاشة قنوات dmc ويقدمه الإعلامي عمرو أديب.

تحيا مصر يرصد في ذلك التقرير تصريحات هنا الزاهد عن شعرها وعلاقتها بأحمد فهمي 

هنا الزاهد: كنت زملكاوية وأحمد فهمي خلاني أهلاوية عافية 

وقالت هنا الزاهد خلال البرنامج متحدثة عن زوجها: بخاف جدا من أحمد فهمي في التصوير وهو بيراعيني  ومبيزعلنيش هو طبعه إنه بيهتم باللي حواليه.

وتابعت: أنا كنت زملكاوية وأحمد فهمي خلاني أهلاوية بالعافية، قالي مينفعش تبقى زملكاوية مينفعش قدام الناس تقولي إنك زملكاوية وتكسفيني عشان الناس عارفة إني أهلاوي جدا، وقولت همشي أموري خلاص كده كده مليش في الكورة أوي.

وتطرقت بحديثها عن شهر العسل، فقالت: شهر العسل باظ وكان أوحش حاجة حصلتلي، ووصلت فيه لـ 47 كيلو وجالي حصاوي على المرارة وكنت تعبانة جدا، بس خلاص هو قضاء وقدر.

هنا الزاهد: شعري أما بينشف بيكون شبه شعر عليا ربيع وأحمد فهمي بيحبه

وتحدثت هنا الزاهد عن شعرها، فقالت: مش بعمل شعري خالص معظم الوقت مش بعمله وفي شغلي أغلب الوقت بلبس باروكة لأني بخاف على شعري أوي إنه يبوظ أو يقع، وشعري في الحقيقة كيرلي ولو طلعت بيه كيرلي مش هيبقى حلو هيبقى كارثة، وبشيل هم إني أروح البحر عشان بيبقى مش ألطف حاجة بيبقى عامل زي علي ربيع لما بينشف، وفهمي بيشوفه وبيحبه عادي.

هنا الزاهد وأحمد السعدني في مسلسل سيب وأنا أسيب 

وعن أحمد السعدني، قالت هنا الزاهد: كنت فكراه في الأول رخم وكنت بشوفه في الجيم كان بيسلم عليا بطريقة غريبة كده وأرجع أقول هو دمه تقيل ولا إيه، وفي الآخر قالي أنا بحبك جدا كممثلة بس كنت مكسوف، طلع بيتكسف أوي.

وعن المشهد الذي عرضها لانتقادات كبيرة على مواقع التواصل الاجتماعي المختلفة، قالت هنا الزاهد: مشهد الشتيمة ده كان المفروض المخرج ياخده من كادر واسع فـ مكنش هيبان حركة الشفايف والناس مكنتش هتفهمها، وأنا استغربت جدا وقولت أكيد غلطة مونتاج وزعلت من السعدني وكلمته قولتله أنت بجد شتمت كده؟ قالي معرفش أنا قولت هياخدوه من كادر واسع.