والدة داليا شوقي ترد على مهاجمي نجلتها وتكشف سبب ابتعادها عن الفن

فجرت الفنانة منال الفطاطري والدة داليا شوقي عدة تصريحات حول تفاصيل منشورها إلى معشر قريش وعبدة الأصنام، بعد الهجوم الذي تعرضت له بسبب دورها في مسلسل سفاح الجيزة وسبب ابتعادها عن الفن. 

تحيا مصر يرصد تصريحات منال الفطاطري. 

تصريحات منال الفطاطري

وقالت منال الفطاطري: لن أدعي أني فقيهة في اللغة العربية ولكن عندي شوية خبرة وبحب اللغة بتاعتي وبستطعمها، وبحب أحس بكلامي وانتقيه وفيه فرق بين “إلى” و"يا"، وكان فيه فئة من الناس مش كتير بيئذوني أنا وبنتي وكنت بحاول أتغاضى وأسيب كل واحد يقول اللي عاوزه.. لقيت الموضوع زاد عن حده ولقيت تريقة وحاجات مش هتفيد ولا هتقدم بل بالعكس ممكن تئذي وتأخر.

وتابعت: لما أقول رأيي في حاجة يبقى من جوايا عاوزة رأيي يتسمع ويكون ذو قيمة عكس لما أشتم حد واتريق عليه وأنا اتحرقت على بنتي وناس كتير علقت وقالت لي أنتي هتكفرينا، لأ ده تعبير مجازي بمعنى شوية رحمة وأنا بقصد فئة من الناس مش بوجه كلامي للناس كلها، قصدت الناس اللي فيه في كلامها تطاول شديد ووراه عدم رحمة ورقة في القلوب.

وأردفت: إحنا كبرنا على معشر قريش وأبو لهب واللي هما الناس اللي معندهمش رحمة، لكن أنا مجبتش سيرة نسب النبي ده كان تخيل مغلوط من الناس لإن المقصود تعبير مجازي ودعمته بعبدة الأصنام وهو أيضا تعبير مجازي بمعنى أنكم لا تتفكرون فيها، لإن بنتي عملت المشهد بإحساس شديد اللهجة وكل خلية في جسمها بتتكلم من صوت ونظرات وأداء ولما أشوف حد متقمص ومتحرك وواكل الشخصية وعايش فيها غير لما أشوف واحدة زي تمثال فهل أنتم تعبدون الأصنام؟.

وأضافت: داليا حست بالمشهد وإحنا عندنا علم بجذور وخلفيات المشهد ودي واحدة عندها مشاكل في البيئة بتاعتها وكان ليها تاريخ مكتوب وحياتها صعبة، ونقد بنتي وجعني وده مش نقد ده تطاول.

واستكملت: مقلتش لداليا هكتب بوست، وأنا مفكرتش إني أكتب البوست ولكن حسيت إن الناس دي معندهاش رحمة وحرام خاصة إنها تعبت نفسها وبذلت مجهود والحمد لله المخرج نصرها وقال المشهد مسؤوليتي لإنه حرام تشيل شيلة مش بتاعتها، والمخرج في ضهرها والأخطاء بتحصل وبتعدي وفيه كتير دافعوا عنها وعلى راسهم كاملة أبو ذكري.

منال الفطاطري تتحدث عن بناتها

واستطردت: أنا تعبت في ولادي أوي، وأنا كنت منفصلة وهما كانوا كل حياتي، وأنا اشتغلت 4 سنين ولكن بالنسبة ليا كأنهم 10 سنين كانوا كورس مكثف يعني والحقيقة إني حققت نجاح ولكن كان عليا ضغوط وأولادي مكنوش مبسوطين، والشغلانة عايزة حد فايق ورايق ومركز أوي وأنا عملت أقصى ما عندي وكان لازم أختار ولادي.

وتابعت: أنا مندمتش ولكن زعلت على 17 سنة عدوا وبناتي اتجوزوا واحدة ورا التانية، ولكن الحمد لله ربنا معوضني وكارمني بيهم، وبقالي 17 سنة بقول لو جالي عمل حلو وظروفي تسمح هرجع للتمثيل، ولغاية دلوقتي ظروفي مسمحتش، وأنا مكنتش بحسب زمان أن البنات هيكبروا ويتجوزوا والحياة هتتغير.

وعن ابنتها بسنت شوقي قالت: بسنت أكتر واحد شايلة مسؤولية في إخواتها، وساعات بحس بفراغ ولكني لسة مشغولة بـ داليا، ومازال بناتي في حياتي ولكن مش زي الأول، وعمري ما حسيت بالفراغ والزهق، أنا عندي 3 بنات وعايشة حيواتهم مش حياتي أنا بس.

علاقة منال الفطاطري بالفنان محمد فراج

وعن تفاصيل علاقتها بالفنان محمد فراج، زوج ابنتها بسنت شوقي، قائلت: أعمل حمى على محمد فراج إزاي ده شربات، وأنا مينفعش أعمل حمى، أنا بحب أوازن بينه وبين بسنت لأنه حبيبي أوي وهو طيب ومُسالم جدًا وبياخد قلبي، هما الاتنين طيبين بس بسنت الجيل الجديد عارفة حقوقها كويس ومتمسكة بيها، وفراج راجل وابن بلد.

واستكملت: مقلقتش من الشائعات اللي بتطلع عليهم لأننا متعودين عليها، وبقى عندنا شماعة الحسد، محسودين إيه ما فيه حاجات نشتغل عليها، ومش عايزين نستعمل الحسد كشماعة مع إنه مذكور في القرآن، وهما الاتنين ما شاء الله ناضجين أوي ومسؤولياتهم كتير أوي ولكن عارفين ينظموا حياتهم وربنا يعينهم عليها.

وأردفت: كان نفسي أعمل دور فاتن حمام في فيلم نهر الحب، ودلوقتي خلاص مبقاش عندي أصحاب في الوسط الفني، غير الفنانين اللي اشتغلت معاهم زي تيسير فهمي وداليا البحيري ونرمين الفقي، ومكنش عندي وقت أعمل صداقات في الوسط ودي من الحاجات اللي زعلانة عليها.