منال الصيفي عن أشرف مصيلحي: في آخر لحظاته كنت بقول يارب كفاية عليه كده تعب أوي

كشفت منال الصيفي عن تفاصيل مرض زوجها أشرف مصيلحي وعن لحظاته الأخيرة، من خلال استضافتها في برنامج كلمة أخيرة مع الإعلامية لميس الحديدي، مساء أمس المذاع عبر شاشة ON.

تحيا مصر يرصد لكم أبرز تصريحات منال الصيفي عن مرض أشرف مصليحي ولحظاته الأخيرة لـ كلمة أخيرة

منال الصيفي: الدكتور قال لي إحنا شاكين في ورم يا نزيف يا جلطة في المخ

كشفت منال الصيفي في البرنامج عن تفاصيل مرض أشرف مصيلحي وكيف علمت بإصابته بمرض السرطان، وقالت: في آخر أيام التصوير طلبت من أشرف يروح للدكتور وكان معانا ماجد يوسف، وفعلًا راح والدكتور قال له عندك ضغط عصبي وأخد مهدئات لمدة يومين، ولكن معجبنيش كلام الدكتور لحد ما نصحه صديقه أنه يروح لدكتور متخصص.

واستكملت حديثها قائلة: لما عرف أننا هنروح لدكتور تاني أتعصب جدًا وقتها وتوجهنا له والدكتور طلب أشعة، ولما أتصلت بالدكتور قال لي إحنا شاكين في ورم يا نزيف يا جلطة في المخ، ولما النتيجة ظهرت قال لنا لازم يعمل جراحه عشان في كيس مياه على المخ وده لأني طلبت من الدكتور يخفي الموضوع عن أشرف.

منال الصيفي: أول صدمة لما عرفت إصابة أشرف بسرطان مخ شرس من الدرجة الرابعة

كشفت منال الصيفي عن أول صدمة لها وكيف تلقت خبر أصابة أشرف مصيلحي بسرطان المخ وقالت: أول صدمة أخدتها كانت لما اكتشفت أنه مصاب بسرطان مخ شرس من الدرجة الرابعة، وعمل جراحة وتعافى شوية، ولما والدته توفيت أتصاب بجلطة أثرت على الكلام والحركة.

واكملت قائلة: أول مرة لاحظنا فيها ده كان وقت تصوير جمال الحريم، لخبط في الكلام وقت التصوير، واتفاجأت أنه مش مجمع ومش عارف يحفظ النص، وبيقولي أنا اسف والله، قولت له معلش هنذاكر سوا وحفظته الدور بصعوبة جدًا وافتكرت أنها مجرد جلطة.

منال الصيفي عن سبب إخفائها مرض أشرف عنه: كان بيخاف من المرض وجبان في الموضوع ده

وكشفت منال عن سبب إخفائها مرض أشرف عنه وقالت: قررت أخفي مرض أشرف عنه عشان هو كان بيخاف من المرض وجبان في الموضوع ده، وبيخاف علينا جدًا من وقت فيروس كورونا، ولما أتصابت بكورونا أتصاب معي ومكنش خايف على نفسه كان خايف عليا أكتر.

منال الصيفي عن آخر لحظات في حياة أشرف مصيلحي: كنت بقول يارب كفاية عليه كده تعب أوي.

وعن أصعب لحظة مرت عليها أثناء مرض مصيلحي قالت منال: لما عرفت بمرضه أتصدمت ولما الدكاترة قالت لي بدأ العد التنازلي لرحيله بسبب تدهور حالته، ولما سألت دكتور ليه كل الإشاعات دي قال لي عايزين نطمن ممكن تفرق في حياته 8 أشهر، وكنت كل يوم في مرضه اقرأ سورة ياسين وفي لحظات مرضه الاخيرة قولت يارب  كفاية عليه كده تعب أوي.

وفي النهاية وجهت منال الصيفي رسالة شكر لزوجها الراحل أشرف مصيلحي وقالت: شكرًا أنك أكرمتنا وسترتنا وخلتنا مش محتاجين  لحد وأنك كبرت الولاد وربتهم كده وأنا هكمل رسالتك زي ما أنت عايز وشكرًا أنك ماتقلتش علينا بكل التعب ده، مهما عملت عشانه أنا مقدمتش حاجة زي اللي قدمه أبويا  وأمي اللي عاشت معانا عشر سنوات بعد رحيل والدي اللي شاله برضه في وقت مرضه.