دعاء حلمي لـ فادي خفاجة بعد انهياره بسبب قلة العمل: يمكن الناس مش حباك ومعندكش قبول

علقت الناقدة دعاء حلمي على لايف الفنان فادي خفاجة على تيك توك والذي تضمن ألفاظ بذيئة ولحظات من انهياره على حاله لعدم توافر عمل وقلة مشاركاته الفنية.

تحيا مصر يرصد تعليق دعاء حلمي على فيديو فادي خفاجة.

تعليق دعاء حلمي على فيديو فادي خفاجة

وقالت حلمي في تصريح خاص لموقع تحيا مصر: الفن عرض وطلب أنت بتعرض سلعة فلو معلهاش طلب فأنت محتاج تعدل فيها أو في نفسك.. ما يمكن أنت مندكش قبول أو الناس مش حباك أو علاقاتك بزمايلك مش قد كده.

دعاء حلمي تكشف عن عدم تعاطفها مع فادي خفاجة 

وتابعت: وبعدين موضوع الشغل دا نصيب ورزق مش بالدراع كل شوية أشرف زكي الحقنا الحقيقة الراجل مش مقصر.. انت بقى غير في شكلك شوف نقط ضعفك وقويها ممكن ميكونش ليك في التمثيل أصلا والجمهور رافضك لأنك مثلت وأنت صغير.. الحقيقة أنا مش متعاطفة معاه. 

فادي خفاجة يعتذر عن بث تيك توك

وكان قال خفاجة نادمًا على الفيديو: أنا مش قادر اقول حاجة غير اني كنت في لحظة ضعف وبرجوا الناس زي ما شايفين اني فنان أنا انسان ولو رجع بيا الوقت مش هعمل الفيديو ومش عارف أنا عملته ازاي وانا بسعى بقالي كتير طول الوقت الناس بتقولي أنت فين احنا متربيين على ونيس.

وتابع: أنا لا حصلت فنان ولا انسان طبيعي وانا لو سبت الناس في حالي وقعدت لوحدي أنا معنديش إجابات وانا بتسأل السؤال دة في اليوم مليون مرة

وأضاف "وكل الأساتذة الكبيرة اللي اشتغلت معاهم كانوا بيشكروا فيا ودة اداني امل وكنت بشوفه رسالة اني اقدم في المعهد العالي للفنون المسرحية واجتهدت واتخرجت بتقدير كل دة راح فين ولما تواجدت في مسلسل زي الاختيار كنت ضيف شرف ودة كان شرف ليا وانتظرت أن أبواب ربنا تتفتح.

واستطرد: وبعد كل دة مفيش وانا مش عارف أنا مبشتغلش ليه واتحدى أن مخرج يقول اني أنا مبجيش في معادي، أو منتج يقول اني ناقشته في الأجر محصلش.

وأردف: سعيت وروحت قابلت مخرجين بدون استدعاء وزمان كنا بنعرف نقابل المخرج دلوقتي لازم تبعت على الميل وتاخد معاد وحتى لو النظام دة كويس بس أنا مش عارف اتواصل معاه لأن وسط كل اللي بيتقدم أنا مش هظهر.

واستكمل: اعز الزملاء ومواهب أكبر مني كلنا بنكلم بعض وبنسال ليه مش بنشتغل لكن أنا بعتذر ومكنش ينفع اللي أنا عملته لكن أنا حصل معايا حاجتين أنا جاتلي رسايل من أمام الكعبة ناس معرفهاش بتدعيلي وناس اخدت الفيديوهات وقطعتها وانا مكنتش متخيل أن ناس تعمل كدة.

واختتم فادي خفاجة حديثه قائلًا: أنا كنت فاتح لايف وبهزر مع الناس لكن كم التعليقات اللي كانت بتقولي أنت مكانك مش هنا فهما داسوا على الجرح.