ناقدة فنية: طريقة نقد الفنان زي الأم اللي بتربي ولادها بالتفاهم أو اللي بتولع في صوابعهم

أكدت الناقدة الفنية حنان شومان على أنه يجب اتباع طريقة بناءة في نقد الفنان، حيث أنها مثل طريقة تربية الأم لأبنائها على حد وصفها.

تحيا مصر يرصد نصيحة حنان شومان للنقد الصحيح. 

نصيحة حنان شومان للنقد الصحيح

وقالت شومان في تصريح خاص لموقع تحيا مصر: النقد لازم يبقى فيه رحمة وإنسانية لأنه عامل زي الأم اللي بتربي ولادها بالتفاهم أو اللي بتضرب بالعصاية وتولع في صوابعهم.

وكان وجه الناقد طارق الشناوي انتقادًا لازعًا لفيلم أولاد حريم كريم، الذي يعرض حاليًا بدور العرض السينمائية ضمن أفلام موسم الصيف.

وقال طارق الشناوي خلال لقاء له ببرنامج ET بالعربي: من أسوأ الأفلام، علي إدريس مخرج مهم وزينب عزيز كاتبة مهمة، أنما اللي عملوه مش بس ملوش علاقة بالجزء الأول، دا ملوش علاقة بفن السينما اللي احنا بنعيشه دلوقتي، دا تراجع لزمن ما قبل الجزء الأول.

وتابع: ومشكلة مصطفى قمر أنه عايش على الزمن القديم، ولما بتفشل كمطرب مش هتصعدك السينما، ومصطفى في عز فشله كمطرب قرر أنه يعمل فيلم، مع ناس مش مطلوبين أوي في السينما والوحيدة اللي كان ليها اسم ياسمين عبد العزيز عشان كدا هي الوحيدة اللي قالت لا.

واضاف: الكتابة في الفيلم قديمة أوي والتفاصيل دي مبقتش تجيب وتضحك ف الفيلم افتقد الضحك، ومصطفى افتقد الوهج، وساعة فيلم البطل كان ممثل وعنده حضور، لكن فقد كل دا.

وقال الشناوي في تصريح خاص لموقع تحيا مصر: اللي أنا قولته كله تحت طائلة النقد وكلمة عمل ردئ توصيف علمي مش شتيمة وبالتالي أنا مطاولتش هو اللي تطاول وتعدى حدود القانون وأنا مش هرد على الإساءة بالإساءة اللي هيقتص هو القضاء المصري.. أنا هاخد إجراء ضده بسبب السب والقذف.

وتابع: وبعدين هو آخر حفلة عملها كانت امتى مبقاش موجود ولما احتاجوه في حفلة حطوه مع 12 مطرب كان هو أقلهم في اليوتيوب والفيلم بتاع أولاد حريم كريم واضح أنه بترتيب الأرقام مفيهوش جاذبية وفاشل بالأرقام.

وأضاف: هو مش قادر يتعايش مع الهزيمة اللي حصلاله في الملعب الفني فبيلقح ويشتم وفاكر أن القانون لن يطوله.