خاص| طارق الشناوي يقاضي مصطفى قمر بعد تطاوله عليه: فاكر القانون مش هيطوله

قرر الناقد الفني طارق الشناوي مقاضاة الفنان مصطفى قمر، بعدما تطاول عليه لانتقاده فيلمه الجديد الذي يحمل اسم أولاد حريم كريم.

تحيا مصر يرصد مقاضاة طارق الشناوي للفنان مصطفى قمر. 

مقاضاة طارق الشناوي للفنان مصطفى قمر

وقال الشناوي في تصريح خاص لموقع تحيا مصر: اللي أنا قولته كله تحت طائلة النقد وكلمة عمل ردئ توصيف علمي مش شتيمة وبالتالي أنا مطاولتش هو اللي تطاول وتعدى حدود القانون وأنا مش هرد على الإساءة بالإساءة اللي هيقتص هو القضاء المصري.. أنا هاخد إجراء ضده بسبب السب والقذف.

طارق الشناوي ينتقد مصطفى قمر

وتابع: وبعدين هو آخر حفلة عملها كانت امتى مبقاش موجود ولما احتاجوه في حفلة حطوه مع 12 مطرب كان هو أقلهم في اليوتيوب والفيلم بتاع أولاد حريم كريم واضح أنه بترتيب الأرقام مفيهوش جاذبية وفاشل بالأرقام.

وأضاف: هو مش قادر يتعايش مع الهزيمة اللي حصلاله في الملعب الفني فبيلقح ويشتم وفاكر أن القانون لن يطوله.

تصريحات طارق الشناوي 

وكان قال طارق الشناوي خلال لقاء له ببرنامج ET بالعربي عن رأيه في فيلم أولاد حريم كريم: من أسوأ الأفلام، علي إدريس مخرج مهم وزينب عزيز كاتبة مهمة، أنما اللي عملوه مش بس ملوش علاقة بالجزء الأول، دا ملوش علاقة بفن السينما اللي احنا بنعيشه دلوقتي، دا تراجع لزمن ما قبل الجزء الأول.

وتابع: ومشكلة مصطفى قمر أنه عايش على الزمن القديم، ولما بتفشل كمطرب مش هتصعدك السينما، ومصطفى في عز فشله كمطرب قرر أنه يعمل فيلم، مع ناس مش مطلوبين أوي في السينما والوحيدة اللي كان ليها اسم ياسمين عبد العزيز عشان كدا هي الوحيدة اللي قالت لا.

من جانبه، قال مصطفى قمر خلال مداخلة هاتفية: النقد يعني أقول مظاهر الجمال ومظاهر الضعف والأخطاء، وأتكلم عن الإخراج والتصوير والأداء والحبكة، هو حر أنه يقول أسوأ فيلم.

وتابع: لكن أنه يقول مصطفى قمر مطرب فاشل دا اللي ضايقني، إحنا نجوم وبنمثل بلدنا بفننا المحترم الراقي، لكن اتبهدل في بلدي ويتقال كلام وحش عني ونتكرم من إخواتنا وحبايبنا في البلاد التانية.

واضاف: أنا مقدرش أسيب واحد في المهنة متخصص يطلع يقول مصطفى قمر فاشل، هو قال في الحوار مصطفى قمر علق فشله كمطرب أنه يجيب نجمات انتهوا وإن مصطفى قمر فقد الوهج، المفروض بعد حواره أحفر تربة وأقولكم موتوني.

واستكمل: من حقي أني أدافع عن نفسي بقوة واللي بيدافع عنه يبقى شبهه ومن نفس النوعية، كل الناس اللي غلطت في شخص مصطفى قمر هاخد حقي بالقانون لكن الناس اللي طلعت تتكلم عن الفيلم هرد عليهم بالنقاش.