ناقدة فنية: الدراما والسينما ينقصهم إنتاج وورق كويس

أوضحت الناقدة الفنية دعاء حلمي ما تحتاج إليه الدراما والسينما خلال هذه الفترة لتصبح في شكل أفضل عن ما هي عليه. 
 

تحيا مصر يرصد تصريحات دعاء حلمي عن الدراما والسينما الحالية. 

تصريحات دعاء حلمي عن الدراما والسينما الحالية

وقالت دعاء حلمي في تصريح خاص لموقع تحيا مصر: ناقصنا إنتاج فمنقدرش ننكر أن الإيرادات على مستوى الدراما أو السينما الحصة بقت قليلة فبالتالي دا بيأثر على العملية الفنية نفسها و ناقصنا كتابة بلسان الناس ويبقى فيها رسالة ومضمون حلو. 

دعاء حلمي تفتح النار على تامر حسني 

هذا وقالت حلمي في تصريح خاص لموقع تحيا مصر عن السوشيال ميديا: السوشيال ميديا بقى أمر مسلم بيه مش بس في المشاكل الأسرية بقت في أوض نومنا كمان، والفنانين بقوا ياخدوه على سبيل الرواج وتحديدًا تامر حسني.

وتابعت: تامر لازم قبل الفيلم بتاعه يا حد اغمى عليه يا هو راح عمل خير يا طلق مراته لازم يعمل أي حاجة شخصية، يعني المفروض عمل الخير دا ميعلنوش لا يلا نعمل فرح ونزغرط فبالتالي بقى فيه ناس بيستخدموا السوشيال ميديا للترويج عن أعمالهم حتى لو حساب حياتهم الشخصية.

دعاء حلمي تنتقد مسلسل سفاح الجيزة 

وانتقدت مسلسل سفاح الجيزة قائلة: المسلسل فنيًا محدش يقدر يتكلم عليه خالص من ناحية الإخراج والموسيقى التصويرية كل العناصر الفنية في الغالب مكتملة ما عدا ينقصنا حاجتين.

وتابعت: الأولى وهي السرد هو شتتني لأن أحمد فهمي طلع بتلت شخصيات وشكل الكاركتر متغيرش فانا كمتفرجة بتلغبط وحكاية الفلاش باك الكتير أوي والنقطة التانية هي فكرة الدم.

وأضافت: يعني ليه دم لو عايز تعمل تأثير نفسي مش محتاج إلا لو انت قاصد وكده بتعلي العنف ودا مش نقل للواقع دا مش فيلم تسجيلي لازم تعمل كنترول وتقدم جريمة القتل بشكل غير مؤذي.

واستطردت: نسب الجريمة بسبب المسلسل دا هترتفع كمان شهرين تلاته، زي ما كنا بنقول أن محمد رمضان السبب في الراجل اللي قطع رأس واحد تاني في الشارع.. ومسلسل زي دا مستحيل يتم إنتاجه من التليفزيون المصري.