خاص| أحمد سلامة: الدراما المصرية لازم تحارب التفكك الأسري.. وتخش جوا الأسرة اللي مبقتش موجودة

أكد الفنان أحمد سلامة على أن الدراما المصرية تفتقد إلى عدة أمور، منها مناقشة الأسرة المصرية الأصيلة، التي لم تعد موجودة بسبب التطور التكنولوجي.

تحيا مصر يكشف رأي أحمد سلامة في الدراما المصرية

أحمد سلامة: الموبيل اختراع فاشل

وقال أحمد سلامة في تصريحات خاصة لموقع تحيا مصر: الدراما المصرية بتفتقد أننا نخش شوية جوا الأسرة المصرية اللي مبقتش موجودة، أنا من منطقة السيدة زينب وعارف يعني ايه لمة العيلة، ويعني ايه احترام الكبير، ويعني ايه كل يوم جمعة العيلة تقعد مع بعض ويتكلموا.

وتابع: دا مبقاش موجود، وكل دا بسبب الاختراع الفاشل الهاتف، لأننا اخدنا أسوأ ما فيه، فلازم شوية الدراما المصرية تخش جوا الأسرة، وتحارب التفكك اللي ابتدى يحصل، لأن دا مش شعبنا، احنا شعبنا أصيل.

تعليق أحمد سلامة على ملابس ابنته سارة

من ناحية أخرى، كان قد كشف أحمد سلامة في تصريحات تليفزيوينة، حقيقة خلافه مع ابنته الفنانة سارة سلامة بسبب ملابسها، فقال: "محصلش خلاف خالص، ومفيش حد يعرف يسيطر على جيل السوشيال ميديا والعالم المفتوح، وفعلًا السوشيال ميديا بتربي معانا العالم، والسوشيال ميديا نقمة على العالم وخلى أفكار الناس منفتحة.

وتابع: سارة متربية في حي السيدة زينب، قولتلها متعملش كده تاني بس مش لدرجة الخلاف، قولتلها ده بره مش هنا لأن هنا مجتمع شرقي، مينفعش نتخطاه، هي وعدتني مش هتعمل كدا، أنا مش ديكتاتور أنا بناقش ومش هقول لأ هقول لأ ليه، وزي ما طلعت سارة في مسلسل ابن حلال، وهي لابسة شورت واتهاجمت أنا وهي وابن الحلال كان أول عمل ليها وكان في ستايلست وخلتها تلبس كده، وكان عمرها ساعتها 18 أو 19 سنة ولبسوها كدا، وهي متعرفش حاجة، ومؤخرًا بتهاجم بس عشان سارة، وبحاول أعمل كنترول عليها.

أخر أعمال أحمد سلامة

ومن الجدير بالذكر أن أخر أعمال أحمد سلامة مسلسل شارع 9، الذي تم عرضه العام الماضي، وكانت تدور أحداثه حول اختفاء ابنة رجل اعمال شهير، تقطن في شارع 9 بمنطقة المعادي ويقرر زوجها العودة من الخارج للبحث عنها ويكتشف انها قتلت في ظروف غامضة يشترك في احداثها مجموعة من سكان شارع 9.

وشارك في بطولته المسلسل عدد كبير من النجوم والنجمات، منهم: رانيا يوسف، نضال الشافعي، محمود عبد المغني، نرمين الفقي، سميرة صدقي، هدى الأتربي، وغيرهم، والعمل من تأليف حسين مصطفى محرم، وإخراج محمد عبد الخالق.