عندي روحانيات اعرف مين بيكدب عليا ومستحيل اعمل مشاهد قبلات.. أبرز تصريحات خالد محمود

فجر الفنان خالد محمود عدة تصريحات مع الإعلامية انجي هشام في برنامج المنسي عبر قناة هي.

تحيا مصر يرصد تصريحات خالد محمود. 

تصريحات خالد محمود

وقال: الفنان قدوة مهمه جدا والدليل أن الممثل الكويس بتلاقي الناس مبسوطة وفرحانه بيه وبتابعه، وبتعمل اللي بيعمله وردود أفعال الناس عليه أن دوره كان إيجابي وبيفيد المجتمع، الممثل اللي بيضر بتلاقي الناس كلها مبتختلفش عليه إنه قدوة سيئة والفن لو مش رسالة مكنش في فيلم كلمة شرف للراحل فريد شوقي يغير قانون في الحياة الاجتماعية أو فيلم جعلوني مجرما الفيلمين دول غيروا قوانين في البلد.

خالد محمود في برنامج المنسي

وتابع:" أنا ضد اللي بيقول الفن مش  رسالة والا مكنتش اتقال على الفن قوة ناعمة، وانا مش ضد مصطلح السينما النظيفة السينما لازم تكون نظيفة احنا بتشتغل عشان نعمل عملية متعة للناس وتتبسط من خلال التليفزيون أو السينما.

وعن مشهد القبلة في فيلم شاويش نص الليل أوضح خالد محمود قائلا :' أنا مكنش بإيدي ومكنتش صاحب قرار ده كان فيلم بطولة لواحد عنده ١٨ سنة ولما اتعرض الفيلم أنا مرضتش عن نفسي في الحته دي على الرغم من أن الفيلم وصل رسالة كبيرة جدا .

وكشف خالد محمود رفضه لمشهد به قبلات في فيلم سينمائي:' أنا مع نفسي لما قعدت قلت مستحيل اعمل حاجه فيها قبلات، وفي فيلم طلب مني مخرج مشهد فيه قبلة قولتله اي المبرر الدرامي فتفهم ولغى المشهد تماما ومن ساعتها لحد دلوقت كل حاجه بالنسبالي تمام.

وتحدث الفنان خالد محمود عن ذكرياته مع مسلسل " ياربي في عزو" و" الحقيقة والسراب" و" محمود المصري " قائلا:' ال٣  مسلسلات كانوا من إخراج مجدي أبو عميره عملت معاه أنجح المسلسلات وشخصيتي في "يتربي في عزو" كانت جديدة عليا خالص لاني كنت عامل فنان شاب بوهيمي والدور نجح نجاح كبير

وتابع:' محمود المصري أكتر مسلسل عملته وانا عاشق ليه محمود عبد العزيز من أجمل النجوم اللي تتعاملي معاهم، وكنت حابب الموضوع جدا كان بيتكلم عن الغربة وتحقيق الذات أما الحقيقة والسراب كان متوفر فيه كل ما تتخيليه من كاست وكان أول نجاح للشركة المنتجة.

واختتم محمود حديثه قائلا:' مكنتش أعرف أنه هيعمل النجاح الغريب ده، اللي يخليكي تفرحي أن الشباب عملينله صفحات على الفيسبوك وكوميكسات كلها طالعه على الحقيقة والسراب وده عمل نجاح  مش طبيعي وكان نقله حياتية بالنسبالي وسعيد بيه جدا.

امتلاك خالد محمود لروحنيات

من جانبه، تحدث الفنان خالد محمود عن فكرة امتلاكه لروحانيات قائلا :' الروحانيات دي قعدت معايا فترة من الزمن وقعدت تكبر وتزيد وتطور لحد ما خوفت وعلى طول افتكرت  لو علمتم الغيب لاخترتم الواقع، هي كانت خاصة بالناس اللي قدامي علشان تبقي بس واضحة عند الناس لأن ممكن متبقاش واضحة  للي معاشهاش.

وأضاف:' كنت مثلا لو قاعد معاكي متعرفيش تكدبي عليا وبتظهرلي الصورة الحقيقية اللي حصلت بالظبط، وانا قاعد مثلا في البيت سرحان ابص  الاقي حد من اصدقائي جاب حاجه  اشوف شكل الحاجه اتصل بيه يقولي عرفت منين اقولوا مبروك وربنا يباركلك وخلاص.

وتابع :' كنت لو  انتي بتكلمي وسرحتي أعرف بتفكري في اي ودي الحاجة اللي زعلان أنها راحت مني، اني اعرف الشخص اللي بيكدب عليا أو اعرف لو سرحتي اي الحاجه اللي سرحتي فيها، لما زادت خوفت وصليت ودعيت تروح من عندي وقعدت اقول لكل اصحابي عليها لحد ما اختفت بالتدريج كده