حسن فؤاد: عمار الشريعي راح وخد معاه الدراما

فجر الفنان حسن فؤاد عدة تصريحات عن كواليس لقاؤه بالموسيقار الكبير عمار الشريعي  كاشفًا سبب اختفاء مطربي التسعينات خلال تصريحاته مع الإعلامية انجي هشام في برنامج المنسي عبر قناة هي. 

تحيا مصر يرصد تصريحات حسن فؤاد. 

تصريحات حسن فؤاد

وقال حسن: بتيجي سيرة عمار الشريعي هنتكلم عن وجدان أمه عمار الشريعي شكل واجدانا مش الوجدان المصري بس، الوجدان العربي عمار الشريعي ده معنى الدراما الدراما الموسيقية، أنا دايما بقول عمار الشريعي راح واخد معاه الدراما.

حسن فؤاد في برنامج المنسي

وتابع:' مسلسل ارابيسك دا كان بيقراه ورقة ورقة مين يعمل كده دلوقتي، علشان يشوف توحيدة الموسيقى بتاعتها هتكون عاملة ازاي ، وأم حسن وحسن ارابيسك هيعمل ايه، كل دول لازم يعرف شخصياتهم في المسلسل علشان يترجم ده موسيقيا.

وأضاف :' أول حد اتعرفت عليه كان مأمون الشناوي، كان أول واحد سمعني وامن بيا أنا كنت محظوظ جدا، الاستاذ مامون لما سمعنى قدمني لمجدي العمروسي مجدي العمروسي يعني عبد الحليم يعني صوت الفن يعني حكاية كبيرة وتاريخ طويل، ومن الاستاذ مجدي العمروسي قابلت بليغ حمدي كان مبدع وعبقري وقالي هقدمك في أول حفلة لكن يشاء ربنا أنه يتعب ويتوفى وبعدها اروح للموسيقار كمال الطويل.

واستطرد:' قابلت كمال الطويل وشوفته وهو بيلحن  وشوفت البني الدم الضخم اللي كان بيتحول لطفل كان بياخدني من ايدي يقولي يلا نلحن وشوفته وهو عايز يولد جملة لحنية وحصل خلاف ومشتغلش معاه وقولت للاستاذ مجدي العمروسي أنا عايز الموسيقار عمار الشريعي، أنا اللي اخترته راح قاله فيه صوت هيجيلك روحتله وانا مذاكر تاريخه وقعدت جمبه ٣ سنوات وأول حاجه عملتها كانت احتفالات أكتوبر، وفي مرة قولتله ما ترشحني في أي تتر مسلسل رمضان جاي قالي هشوف وبعدها اخترني لأ ارابيسك".

ولفت: حاجات كتير اوي اختلفت يعني مقدرش اقول ان اللي بيتقدم ده فن شعبي، دايما بقول محدش ضيع المزيكا في مصر غير  الفن الشعبي لأنهم فاهمينه غلط، الاطلال دي غنوة شعبية حد يصدق ؟ اة شعبية لأن بيسمعها المكوجي، بيسمعها النجار بيسمعها الظابط بيسمعها الوزير لكن الذوق اتغير لانهم فهموا المسألة غلط.

واستكمل :'  محمد  رشدي هيفضل رقم ١ في الغنوة الشعبية هيفضل محمد العزبي رقم ١ هما دول الغنا الشعبي، حد يقول الغنا الشعبي يبقي محمد رشدي، محمد رشدي هز عرش عبد الحليم حافظ، لكن دلوقتي اللي بيتقدم مش غنا شعبي لا شكلا ولا موضوعا مع احترامي لكل اللي بيغنوا شعبي.

وقال:' مش بسمع مهرجانات غير في الشارع مقدرش لا ذوقي ولا شكلي ولا تربيتي.

حسن فؤاد يتحدث عن مسلسل أرابيسك

واختتم حديثه قائلًا:' أنا ضد أنه يتقال أن الجمهور عاوز كده واكبر دليل أن فترة مسلسل " ارابيسك" أن شعبان عبد الرحيم كان طالع  لكن غنوة تطلع وتكسر الدنيا يبقي الجمهور مش عاوز كده الجمهور عاوز شغل مخدوم كلاما ولجنا وأداءا ويقي في حاجات بتتفرض عليه، أنا من فترة في فرح مكنتش مصدقه . اللي انا سمعوا.