انتصار لـ الرجال: أوعى تعزم البنت على العشاء في المقابلة الأول.. يمكن متعجبكش ومتحبش ريحتها

كشفت الفنانة انتصار عن عدد من الخطوات التي يجب على الرجل والمرأة اتباعها خلال المقابلة الأولى للتعرف، كما وجهت رسالة للفتيات.

تحيا مصر يرصد تفاصيل تصريحات انتصار في برنامج من غير نفسنة

تصريحات انتصار في برنامج من غير نفسنة

وقالت انتصار، في مقدمة برنامجها “من غير نفسنة” الذي تقدمه مع الفنانة بدرية طلبة ونوليا، عبر شاشة قناة “هي”: اللقاء الأول ده يا إما هنكمل مع بعض يا إما مش هنكمل القاعدة مش العلاقة، وأوعوا تقابلوا بعض وتقولوا عشاء أو غداء، وأنت إياك تعزمها على غداء أو عشاء، لأ تقولوا هنشرب حاجة مع بعض، علشان لو أنت قعدت معاها واتضايقت من حاجة زي مثلًا نبرة صوتها تفاهتها أو ريحتها، متبدسش في 6 ساعات، لكن هتشرب حاجة في نص ساعة وتقولها هشوفك بقى وتليفونات، ده لو أنت اتخنتق نتيجة غباوتها وعينك مش طايقة تشوفها.

وتابعت: لو عجبتك قولها طيب تحبي نتعشى؟ ولو هو اللي مش عاجب البنت ترفض أنها تتعشى وتشرب حاجة وتمشي، ولو عجب البنت تقوله أنا عزماك على الغداء، وتلزيق المحبين ده.

انتصار: مش لازم تحكي فركشتي مع مين قبل كده

وأضافت: لو إنتي رغاية بطبعك وبتحبي تتكلمي في كل حاجة وسيرة أهلك، مش لازم تعملي كل ده في أول أو تاني لقاء، ومش لازم تحكي فركشتي مع مين قبل كده ومين اللي جه البيت واتقدم، على فكرة هو مش جاي يعمل كشف هيئة، الراجل لسة بيشوف روحك.

‎“من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا،  يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.

انتصار: مفيش حاجة اسمها كل الرجالة خاينين ووحشين

وسبق وأن علقت الفنانة انتصار، قائلة: مفيش حاجة اسمها كل الرجالة خاينين ووحشين، ليه ما الراجل ده أبوكي وأخوكي وابنك اللي مخلفاه من بطنك، وابن عمك اللي بيخاف عليكي وبيرعاكي، كل دول وحشين؟ ولا إنتي مركزة بس في العلاقة العاطفية مع الزوج والحبيب؟ الرجالة اختزلتيهم في دول؟ في حاجة اسمها بعض ونسبة، وناخد كل نسبة بحالتها وتربيتها.