محمد رمضان بعد حفله في السعودية: الجمهور السعودي بيدعمني من بداياتي

تألق الفنان المصري محمد رمضان، في حفله أمس الجمعة بالرياض على مسرح محمد عبده ببوليفارد.

وقال في لقاء له على هامش الحفل: الجمهور السعودي جمهور عظيم والحمد لله الحفلة ناجحة وده المتوقع من الجمهور السعودي لأنهم دايما بيدعموني من بداياتي، والجمهور السعودي من الشعوب اللي بتساهم بشكل كبير جدا في صناعة أي نجم عربي.

وتابع بعد إحيائه الحفل ضمن موسم الجيمرز أرض الأبطال: جيلنا اتربى على الألعاب الإلكترونية، من أيام السيجا، والنسخة اليابانية من البلايستيشن، وجيلنا اتربى على إنها شيء أساسي، وأعتقد إن هي بتنمي العقل والفكر الاستراتيجي.

من جانبه، كان قال محمد رمضان في لقائه مع معتز الدمرداش: «قسم الملابس جزء مهم جدًا في صناعة السينما أو الدراما أو المسرح لا يستهان به، بتعامل مع حفلاتي مثل المسرح فهي عرض ترفيه، الاضاءة بيتم استخدامها بوعي، حسب كل أغنية، فأغنية مافيا لها انترو، والعربية بتطلع بشكل معين، والكشافات اللي بتنور فقط ثم النور الازرق بيفتح براحة، صوت الأوكرة موجود في كل السماعات، صوت خطوات رجلي، فحفلاتي عرض ترفيه».

وتابع: «أنا مش بضع المايك تحت ذراعي وأقول السقفة معانا، أنا مبعملش ده، وهو ده اللي بيميز حفلاتي وبيخليني أغلى مغني في الوطن العربي، فالمغني المصري اللي أجره تحت أجري بياخد 50 في المئة من أجري».

تصريحات محمد رمضان 
وأضاف: «فيه دليل أو شئ بقدمه يستحق ده، مش فكرة أن ده أجري مش عافية وخلاص، حفلتي بتطلب مجهود أخر، والجمهور بيخرج مستمتع وبيخرج عينيه مرتاحة وشاف شئ جميل وجديد مع الأغاني اللي حافظها، الفضل في ده يرجع لربنا وللممثل وخبرتي في المسرح والسينما».

وسبق وقال محمد رمضان: الرحلة أنا مبسوط بيها جدًا بدأت من ضواحي الجيزة والمنطقة اللي أنا اتولدت فيها شكلت جزء كبير في شخصيتي وخيالي، وبيتي أبويا وأمي وإخواتي شكلوا شخصيتي ورؤيتي للمستقبل.

وتابع: أخويا وأختي خريجين آداب فلسفة، فعايش مع اتنين فلاسفة، والفلسفة هي البحث عن الحقيقة، فالكتب متناثرة حولي، وكنت بحب القراءة جدًا، كنت بتخليني أغوص وأعيش فيها، أخويا كان بيجب كتاب الأيام لطه حسين، وإيمان أختي كانت عاشقة للقراءة.