كنت ابن مدلل وبعيط في الجيش.. أبرز تصريحات أحمد فؤاد سليم في ندوة تكريمه

فجر الفنان أحمد فؤاد سليم عدة تصريحات خلال ندوة تكريمه في دار الأوبرا المصرية، حول المسرح وحياته ومشواره الفني وغيرها من أمور الفن.

تحيا مصر يرصد تصريحات أحمد فؤاد سليم. 

ندوة تكريم أحمد فؤاد سليم في دار الأوبرا

وقال أحمد فؤاد سليم: الحياة نفسها لعبة، والطفل الصغير من البداية بيكتشف الحياة من خلال اللعب، والمسرح والفن معادل للحياة، إديني مسرح أعملك مجتمع عظيم دي مقولة، احنا بنطرح مشاكلنا سواء مسرح أو تلفزيون عشان نناقشها، إحنا بنطهر طول الوقت يعني بنحل مشاكلنا والعقل الغريزي ده يخلي الإنسان ينقذ نفسه، ولكن مع تطورات الحياة دلوقتي هذا العقل الواعي مش مطلوب في الزمن ده، ولكن لابد من السيطرة عليه.

وتابع: الفن لعبة بنّاءة، أنا ليه بمثل دور في العمر ده؟ لأن عندي مساحة ما عايزة أوريهالك يمكن أنت مش شايفها يمكن بنوريلك الطريق، الفن مشاركة والإنسان قيمته في المشاركة، وإحنا دلوقتي رايحين على الذكاء الاصطناعي ده والتليفونات فتت المجتمع ومحتاجين نناقشها، دي قضايا زيها زي ارتفاع نسبة الطلاق في مصر.

وأضاف: الفن ضرورة وكل المفكرين قالوا كده، احنا بنعرض مشاكلنا وقضايانا علشان نحلها، أنا في الحوار الوطني كنت بقول إن المسلسلات حالة ضارة؛ لأنها بتعلم الناس الكسل، الهمة راحت والعيل الصغير مبقاش يشيل الكوباية من مكانها علشان عارف إن في غيره هيشيله، إيقاع الحياة بقى مختلف، هل الفنانين عارفين الاختلاف ده؟ هل الفن بدأ يحاكي هذه الأشياء؟ لأ للأسف.

أحمد فؤاد سليم يتحدث عن أهمية المسرح

و عن أهمية المسرح قال: المسرح معمل باخد فيه خبرات، ولما تشتغل سينما وتليفزيون طول الوقت الطاقة بتقل غصب عنك، لكن المسرح بيديك طاقة من خلال جمهوره، والمسرح قيمته الحقيقية في الناس، وكل يوم في تطور وبتشيل الشخصية معاك كل يوم، مرة ممثل أحرجني على المسرح وأنا سكت ثانية وجاوبت إجابة مفاجأة وخدت فيها سوكسيه، وبعدين حاولت أعملها تاني مكنتش بتضحك، والفكرة كلها في العفوية ولأن الناس عاشت معايا نفس المحنة أن ليه السؤال ده؟

وأضاف: أنا بحب المسرح وبعمل معايشة حقيقية وجوايا أنا بلعب، وأنا بتعذب لأني مبشتغلش مسرح، يعني مفيش نصوص ومش عارف في إيه.. القضية مش قضية مخرجين.. المخرجين عايزين يشتغلوا.

وتحدث عن الفنانة الراحلة أمينة رزق، وروى موقف جمعه بها خلال تقديمها أحد المسرحيات قائلا: أفتكر واقعة حصلت في المسرح زمان، مع الفنانة أمينة رزق لما حست أن جورج أبيض داخل عليها يموتها بجد في المسرحية وطلعت تجري في الشارع وهو طلع يجري وراها وده جنان بجد، والعقل لابد من وجوده.

وقال أحمد فؤاد سليم: بشكر اللجنة العليا اللي رشحتني للتكريم وأستاذ محمد رياض وأصدقائي، والحمد لله أنا سعيد بهذا التكريم، وده حافز أني أقدم أعمال أخرى وأنا مؤمن بالفن البناء مش الاستهلاكي، والفن البناء بيتعرض لمشاكل الناس وبيناقشها، ولما بقبل الدور ببدأ أدخل في تصورات مع نفسي، ولو الدور مفيش فيه جزء من شخصيتي ببدأ أشوف في علم النفس والاجتماع وبشوف الشخصية هل هي متحققة في نفسي ولا لأ، ولو تحققت هذه الأشياء ببدأ في مذاكرة الشخصية،  وتفاصيلها وبنسى إني أحمد فؤاد سليم.

نشأة أحمد فؤاد سليم 

وكشف عن نشأته قائلًا: أنا من أسرة متوسطة الحال وكنت ابن مدلل شوية لأني الكبير، وأول 10 أيام في الجيش كنت بعيط لأن مفيش حرية ونظام صارم جدا، وتجربتي في الجيش أفادتني في تنظيم حياتي، وجزء المسرح جوايا خلاني عرفت قيمة نماذج المعارف في العسكرية.

واختتم حديثه قائلًا: قعدت حوالي 6 سنين في الجيش من وقت حرب الاستنزاف وحاولت أدخل قبل سنة 74 مرتين المعهد وسقطوني وكنت بسقط في المواد النظرية، ومع الاعتراض على فكرة السقوط خدوا بالهم ونجحوني ودخلت.