عمرو دياب احنا مش قده وستار أكاديمي كان نقمة.. أبرز تصريحات محمد عطية

علق الفنان محمد عطية، على مشاركته في برنامج ستار أكاديمي، مشيرًا إلى أنها كانت نقلة في حياته على المستوى الفني والمادي.

تحيا مصر يرصد تصريحات محمد عطية. 

تصريحات محمد عطية

وقال محمد عطية: برنامج ستار أكاديمي زي ما كان نعمة في وقت من الأوقات، كان نقمة في وقت من الأوقات، لأن الناس اتعلقت بالشخصيات مش بالأعمال الفنية، ولما اتخرجت من الأكاديمية الناس مستنية أغاني على الشخصية اللي شافتها، والناس عايزة أغاني على مستوى عمرو دياب، يا جماعة عمرو دياب إحنا مش قده ده قعد 20 سنة خبرة، أنا بدأت اكتسب خبرة مؤخرًا، لأني مريت بنجاحات وفشل وبدأت اختار، أنا روحت ستار أكاديمي شاب من طنطا بسيط جدًا، راجع مصر الناس كلها عارفاني كنت مخضوض.

محمد عطية يتحدث عن عمرو دياب 

وتابع: حاولت كتير إني اشتغل، وكنت بستنى عمرو دياب عند الاستوديو بالـ 8 ساعات ومبعرش أشوفه، وتامر حسني كنت بستناه عشان أسمعه أغنية، وأنا محظوظ إني عديت بالمشوار ده وفي نصه جت محطة ستار أكاديمي غيرت حياتي كلها، وبقى تامر حسني يكلمني وعمرو دياب عارف اسمي.

وأضاف: كل مرحلة عدت على الواحد في حياته وبحن ليها أكيد بتوحشني، لكن معنديش حتة إني أعيدها تاني، وستار أكاديمي كانت مرحلة حلوة وغيرت في حياتي، لكن مش هخوض نفس التجربة تاني، الحياة فيها حاجات تانية نجربها.

سبب انفصال محمد عطية عن ميرا مخايل

هذا وقال محمد عطية: كنت بحب ميرا مخايل فعلًا في برنامج ستار أكاديمي، وفضلنا 3 سنين ونص متصاحبين بعد برنامج ستار أكاديمي، وهي دلوقتي متجوزة وهي صديقة رائعة، ومكملناش بسبب اختلاف الدين.

وتابع: أنا معنديش مشكلة في الحاجات دي وعندي اعتقاد شخصي أن الحب بيتزرع في قلب الإنسان من ربنا، والدين فكرته كلها تهذيب البشرية والناس تكون بتحب بعض، لو بتعملي ده إيه المطلوب تاني غير كده؟ وفي الآخر إحنا في حياتنا عايشين علشان نتبسط كل اللي حوالينا ده ديكور.

وسبق وقال محمد عطية: الحب الأفلاطوني لأ.. لأنه غير صحي.. بداياته فقط بتكون ممتعة، لكن عادة ما ينتهي بوجع قلب وخسائر لأنه بيبقي فاقد الجانب العقلاني، الحب تدريجيًا بناءً علي عقل وتفاهم بيوصل بالطرفين لعلاقة صحية بكتير من الحب اللحظي.

وتابع: الحب هو أن تجد شخص تستطيع أن تصبح نفسك تماما أمامه، وأن تستطيع التواصل معه دون معوقات أو تبريرات لتصرفاتك.. ولكن عامة الحب بيزول عاجلا أم آجلا لذلك التفاهم والتقبل هما سر استمرارية أي علاقة صحية.

وأضاف: فكرة الندم بسبب سن معين في الارتباط هي فكرة مجتمعية.. الحياة ممكن الاستمتاع بيها وتحقيق أهداف تانية كتير غير تكوين الأسرة.. مش شرط يبقي هدفنا كلنا واحد وغايتنا في الحياة هي الجواز أو الارتباط.. حققي ذاتك بأي شكل يشبعك أنتي بغض النظر عن المجتمع عاوز منك إيه.