مجدي إدريس: طول عمري بحلم بالسجادة الحمراء.. وأنا مش بقال ومش ببيع إبداعي

كشف الفنان مجدي إدريس سبب بعده عن الساحة الفنية، وذلك خلال حواره مع الإعلامية إنجي هشام في برنامج المنسي عبر قناة هي.

تحيا مصر يرصد تفاصيل تصريحات مجدي إدريس 

سبب ابتعاد مجدي إدريس عن الساحة الفنية

وقال مجدي إدريس: في فرق بين موجود ومتواجد أنا موجود، لكن بعيد عن الساحة الفنية لأسباب عديدة أنا مقتنع جدا باللي أنا فيه وعندي سلام نفسي جوايا وعارف أنا بعمل ايه، أنا معنديش مشكلة إني ادخل مسلسل كبير اعمل مشهد بس لازم المشهد يكون مؤثر والشخصية كويسة.

وأضاف: عدم وجودي سببه إن المسألة بقت صناعة لكن مينفعش تقولي تشتري بكام واقولك تعالى ده بكذا وده بكذا، يعني لما فنان يقولك تعالى دا منتج لا ممثل طيب عاوزني معاك على أساس إيه.

وتابع : أنا بشتغل في العمل مش بشتغل مع فلان، أنا مش برفض إن فنان يقولي تعالى عايزك معايا دور لكن متصدريش إن تعالى فلان عايزك مينفعش بقرش جبنه وبقرش حلاوة في المهنة مينفعش مع احترامي لجميع المهن أنا فنان مش بقال ومش بنبيع إبداعنا.

مجدي إدريس: طول عمري بحلم بالسجادة الحمراء

وفي اللقاء ذاته، كشف الفنان مجدي إدريس عن أمنياته التي لم تتحقق بعد :' دايما بقول افرد جناحات الامل واحضن حلمك وطير هتوصل، بس انا طول عمري بحلم بالسجادة الحمراء هوليود من وانا صغيرة نفسي اوصل للعالمية أنا ممثلتش لحد النهاردة والله ما مثلت اقسم بالله ما مثلت ومحضر الأدوار اللي انا عاوز اعملها كلها.

وأضاف: محضر كل الأدوار اللي عايز اعملها في الكلاسيكيات كلها وعامل لكل شخصية تركيبة والامل مش بعيد ربنا زي ما بيهب الإنسان من عنده سبحانه وتعالى ربنا لما يهبك شيء جميل تأكدي أنك مش هتخذلي فيه ابدا هتنجحي.

وتابع: طال العمر أو قصر دي بتاعه ربنا يعني لحقنا اخر عربية في القطر كان بها ملحقناش يبقي اللي بعدنا يعملوه إنما متستغربوش علي فكرة ممكن يقولوا الراجل ده مجنون ولا ايه ليه لا ده حلم مشروع كمان نفسي احج ونفسي احفاد احفادي في يوم الايام ميجيش يقولوا جدك كان بيعمل كذا وكذا وحش مش ولادي بقي لا أحفاد احفادي كمان.