منى فاروق: فكرت في التخلص من حياتي.. واتعرض عليا حاجات حرام بمقابل ورفضت

تحدثت الفنانة منى فاروق عن قرار اعتزالها الفن والسوشيال ميديا، خلال مداخلة هاتفية لها ببرنامج خط أحمر على شاشة تلفزيون قناة الحدث اليوم.

تحيا مصر يرصد تفاصيل تصريحات منى فاروق

تصريحات منى فاروق اليوم

وقالت منى فاروق: أنا تواصلت مع كل المخرجين، وكلمت أشرف زكي قالي أنتي مش نقابية، ومحدش راضي يديني كارنيه النقابة ومش بيتقال ليه، ومحمد السبكي لما قابلته في دبي واتصورت صورة، قالي مش هقدر اشغلك عشان أنا بتهاجم بسببك.

وتابعت: أنا مش متجوزة وبصرف على بيتي وأهلي، وعايزة أبقى شريفة واشتغل بالحلال، ومش عايزة أعمل أي حاجة وحشة ولا أي حاجة حرام، وفيه ناس على السوشيال ميديا بتهاجمني، وفيه ناس بتقولي اشتغلي حاجة تانية، هاتهالي بس اضمنلي أن مدير الحاجة التانية ميطلبش مني حاجة قلة أدب، ودا اتعرض عليا وسيبت الشغل.

منى فاروق: فكرت في الانتحار أول امبارح

واستكملت: أنا اتسجنت 4 شهور ونص في سجن القناطر وكانت مرحلة بشعة، وروحت لدكتورة نفسية قالتلي مستحيل تتخطي اللي حصلك من غير ما تشتغلي، واتعرض عليا حاجات وحشة وحرام بعد الأزمة بمقابل مادي وأنا رفضت، أنا سيبت شقتي وبيعت عربيتي ومش معايا فلوس، وفكرت في الانتحار أول امبارح.

منى فاروق: مش عارفة ادفع إيجار بيتي

وسبق وأن حرصت الفنانة منى فاروق التعليق على قرار اعتزالها، مؤكدة على أنها تريد العمل في الفن بشدة، وذلك من خلال منشور عبر حسابها الشخص على موقع تبادل الصور والفيديوهات إنستجرام.

وكتبت منى فاروق خلال خاصية استوري: مساء الخير.. الكلام اللي بقوله دا خارج خالص عن فكرة أني أخد التريند، واعمل زي أي حد.. أنا قولت اعتزلت الفن لسبب واحد.. دا مصدر رزقي الوحيد اللي أنا بحبه وعاوزة اشتغله، لكن لما أوصل لمرحلة أني مش عارفة ادفع إيجار بيتي.. حاجة تتعب.. أنا محتاجة اشتغل عشان أعيش زي أي بني آدمة طبيعية.

وتابعت: أنا غلطت وربنا بيسامح ليه البني آدمين مش عاوزين يسامحه.. أنا بسمع بودني لا بلاش منى عشان الفيلم والمسلسل ميتضرش، ليه ياربي أنا بقيت منبوذة من كل الناس، أنا مش طالبة غير أني اشتغل في الحاجة اللي بحبها عشان أعرف أعيش.. المجتمع حططني في المكان الوحش بس مش يمكن عاوزة أبقى كويسة زي أي واحدة، ليه بتقفلوها قدامي.