صبري فواز يكشف حقيقة خلافه مع مصطفى كامل بسبب المهرجانات

فجر الفنان صبري فواز عدة تصريحات حول خلافه مع الفنان مصطفى كامل نقيب المهن الموسيقية ورده على منتقدي التمثيل.

تحيا مصر يرصد تصريحات صبري فواز. 

تصريحات صبري فواز

وقال صبري فواز خلال لقائه مع الإعلامية سهير جودة: مفيش بيني وبين مصطفى كامل أي مشكلة ولكن المشكلة إننا محتاجين نستوعب أكتر إننا مختلفين واللي بيحبوا المهرجانات بني آدمين زينا زيهم وعايشين واللي بيحبوا الراب والكلاسيك ومي فاروق وبهاء سلطان موجودين.

صبري فواز في الستات

وأضاف: إحنا كتير وأذواقنا مختلفة ولو أنا بسمع أم كلثوم مش معناه إن اللي بيسمع عمرو دياب غلط وأنا صح، كل الناس حقها يكون لها مساحة ومفيش حاجة اسمها أمنع شخص لإنه مش عاجبني، سيب الناس تغني وهنشوف الحاجة دي هتفضل موجودة ولا لا وساعتها نحكم.

رد صبري فواز على منتقدي الفن

وعلى منتقدي الفن رد قائلا: التمثيل مهنتي درستها وشقيت فيها ومسمحش حد يعتبرها تافهة والعمر راح واحنا بنشقى فيها، وعيب حد من الزملاء الفنانين يقلل من التمثيل واللي بيعمل كدا بقول له عيب تكون بتأكل عيالك وبتاكل من المهنة وتقلل منها، عيب احترم أكل عيشك.

واختتم صبري فواز حديثه قائلًا: اللي بيهاجم الفن عنده عدم معرفة، وأنا لما بختلف مع كلام شخص لا يعني إني مش بحترمه، وكل الناس على راسي وبقدرهم ولكن طبيعي اختلف مع وجهة نظرهم.

وكان قال صبري فواز خلال برنامج 60 دقيقة: الحب الأول كان في الثانوية العامة، أما الإسكندرية فلم أعش قصة حب فيها، لأنني كنت مشغولا بتأسيس نفسي كفنان، في  الفترة دي كانت الحركة الفنية عظيمة، الإسكندرية كان فيها فرق مسرح في الأنفوشي وقصر الحرية وقصر الإبداع والمركز الفرنسي في شارع النبي دانيال والأتيليه، وكان شارع النبي دانيال منارة في حد ذاته، وكانت الإسكندرية فيها أكثر من 12 باندا غربيا للمزيكا بالإضافة إلى البند الشرقي.

وتابع: بحب الحياة، احنا جينا للحياة عشان نعيشها بكل ما فيها فرح وحزن، كل ظرف بنمر بيها لازم نعيشها بالشكل الأمثل لأننا لو عشنا الأحداث السعيدة بس نص الحياة هتكون فاتننا، وبالتالي كل ظرف نمر بيه لازم نعيشه، الحياة جمالها يكمن في اننا نعيش كل لحظاتها حتى المؤلمة.