عندي مشكلة في الانجاب ومش عايز مراتي تغني.. تصريحات رامي جمال

حل الفنان رامي جمال ضيف على برنامج “حبر سري”، المذاع على قناة القاهرة والناس وتقدمه الإعلامية أسما ابراهيم، والذي كشف خلاله عدد من التصريحات الجريئة يرصدها تحيا مصر في ذلك التقرير.

رامي جمال: مينفعش مراتي تغني لأن لازم أكون أنا اهتمامها الأول

أوضح رامي جمال سبب رفضه لـ دخول زوجته عالم الغناء، فقال: “أنا كان عندي مشكلة، عايز الست بتاعتي أكون أنا الاهتمام الأكبر في حياتها، الفن بيسرق العمر، وعايز وأنا عمري بيتسرق يبقى معايا اللي بحبها في إيدي، مش أنا مسروق في حتة وهي في حتة، وقولتها قبل ما نتجوز اكتبيلك أغنيتن تلاتة ولو نجحتي فيها جامد كملي لكن مش هنتجوز".

وأكد رامي جمال أنه يعاني من مشكلة في الانجاب، فقال: أنا عرفت إن عندي مشكلة في الإنجاب، أكيد نفسي في حد يكمل اسمي، لكن الحمد لله من نعم ربنا إنه يرضيكي بكل حاجة، وكنت بخاف على ناريمان تتأذى من الموضوع، وقلت لها إحنا عايشين مرة واحدة، مفيش وقت تعملي جدع وتضيعي على نفسك حلم الأمومة".

وتابع: "ردت عليا بنفس الكلمة، كل أنواع الرزق بتيجي لكل شخص لوحده، إلا الخلفة رزق مربوط لإثنين".

رامي جمال: اللي بيقارني بتامر عاشور بيقارني بفنان شاطر

وأشاد رامي جمال بـ الفنان تامر عاشور، فقال: أي خطوة للفنان تامر عاشور ممتعة لي ويريد أن يحقق مزيد من النجاحات خلال الفترة المقبلة، واللي بيقارني بتامر عاشور بيقارني بفنان شاطر جدًا وأخ.. وأنا تامر قسمنا اللقمة سوى.

ودافع رامي جمال عن محمد فؤاد، فقال: رامي جمال ابن الجمهور المصري وملكه، أكيد الجمهور المصري عايز عايز رامي يبقى موجود في السعودية وأي مكان ناطق بالعربية، ويا ريت لو وصل للعالمية.

رامي جمال: محمد فؤاد عاطفي وهو رمز من رموزنا لازم نحترمه

واستكمل: انت لو قابلتني حلو مينفعش أعاملك وحش، بالعكس لازم أشكرك على المقابلة الحلوة، وما تقوم به السعودية مع الفنانين العرب والمصريين تحديدا واجب الشكر، والشكر حاجة من الأصول، نا شايف حد عمال يكرم كل رموز الفن المصري، وليالي مصرية لأسماء كبيرة جدا، ممكن من الإبهار اللي شافه في المعاملة ومقابلة الجمهور مرتبش كلامه وزود شوية، مسموح في الحب الزيادة.

واختتم: محمد فؤاد من زمان عاطفي، بيتكلم براحته وبانفعالات، وإحنا بنحبه وهو رمز من رموزنا ولازم نحترمه.