يوسف وهبي: شخصيتي في ليه لأ 3 شبهي في حاجات كتير.. أنا مع زواج الأم المطلقة.. وانتظروني في رمضان 2024| حوار

من بين الوجوه الشابة التي ظهرت في مسلسل ليه لأ 3، خطف الفنان يوسف وهبي أنظار عدد لا يستهان به من الجمهور والمشاهدين، من أول طلة له في الحلقات بشخصية “عمر”، وذلك نظرًا لما تميز به من كاريزما، خفة ظل، وحضور قوي طاغي في جميع مشاهده، مما جعله ينال استحسان وإعجاب الكثيرين.

لذا أجرى موقع تحيا مصر معه حوارًا خاصًا ليكشف لنا عن تفاصيل تجربته في مسلسل ليه لأ 3، وأهم ما حمسه للمشاركة في العمل، والكثير من الأمور الأخرى.

وإليكم نص الحوار:

1- في البداية.. كيف جاء ترشيحك للمشاركة في مسلسل ليه لأ 3؟

أنا جالي الدور دا عن طريق "أوديشن"، وبعدها بأسبوعين لقيتهم بيقولولي تمام أنت معانا خلاص في دور عمر.

2- ما الذي حمسك للمشاركة في مسلسل ليه لأ 3 ؟

حمسني للمشاركة في مسلسل ليه لأ 3، أن المسلسل بيعجبني فكرته حتى الجزء الأول والتاني، لأن بيبقى فيه حاجة في المجتمع هما عايزين يظهروها بشكل معين، ويظهروا أن المشكلة دي محتاجة تتغير، ودي حاجة عجبتني لأن ليها رسالة مهمة، أما بالتحديد ليه لأ 3 أنه مش بس بيتكلم عن قضية واحدة، هو بيتكلم عن حاجات كتير فدا كان ممكن يكون الاختلاف عن الأجزاء السابقة.

القضية الرئيسية في المسلسل كانت أن الست المطلقة عادي أنها تتجوز، وفيه بردو رسايل تانية زي أن كريم اللي هي بتحبه دكتور بطري فهما بيحاولوا يظهروا الاهتمام بالحيوان ودي حاجة بتبسطني، بالإضافة إلى أن البنت مش المفروض تكون مهملة كدا من الأم.

3- هل هناك وجه شبه بين شخصية عمر وشخصيتك الحقيقية ؟

عمر فيه حاجات كتيرة شبهي فيها، زي أنه شخص اجتماعي، ومش بيتكسف، وهو بيحب التصوير وأنا كدا، الحاجة التالتة أنه رومانسي وأنا ممكن أقول أني رومانسي نوعًا ما بس مش بأفورة المسلسل، وأنا مش رومانسي لدرجة أن أصور بنت أنا معجب بيها، والحاجات اللي هو مش شبهي فيها أنه بيحب الشعر وأنا مليش فيه، وبكره الشعر.

4- كيف كانت الكواليس مع فريدة رجب.. وهل نشأت بينكما علاقة صداقة بعد التصوير ؟

فريدة لذيذة جدًا جدًا واللي عاجبني فيها أنها مختلفة عن المسلسل، هي في المسلسل تبان نكدية وعلى طول متضايقة، بس في الحقيقة هي شخص لذيذ جدًا، وأه طبعا فيه علاقة صداقة جمعتنا بعد المسلسل لأن كل الشباب اتجمعنا أول يوم واتفرجنا على الحلقتين مع بعض والموضوع كان لذيذ.

5- ما رأيك في القضية اللي يتناولها مسلسل ليه لأ 3 (زواج الأم المطلقة) ؟

أنا مع أن الست ممكن تتجوز بعد ما تطلق عادي أو تبقى أرملة، ولو كنت مكان ياسين مش هكون رافض حاجة زي دي، وأنا مليش الحق أني أوافق أو موافقش، اه ممكن الموضوع يبقى في الأول رخم شوية أو تقيل، عشان بردو مامتي وهيبقى راجل غريب، وطبعا مش هيبقى عندي ثقة فيه في الأول، بس طبعا في الأول وفي الأخر دا قرارها، وهي من حقها تعمل اللي هي عايزاه زي ماهو من حقي أعمل اللي أنا عايزه.

6- في رأيك.. ما الذي يميز المخرجة نادين خان ؟

اللي بيميز أستاذة نادين أن هي بتدي فرصة للوجوه الجديدة، هي عملت كدا في مسلسل ليه لأ، وفي مسلسل مين قال، هي بتدي الشباب الجداد مساحة يوروا اللي عندهم، ودي حاجة مش موجودة عند مخرجين كتير، وهي لذيذة جدا في اللوكيشن، وسهلت عليا الموضوع، ومكنتش حاسس خالص أن الموضوع شغل على قد ما هو احنا جايين ننبسط مع بعض، ودا ساعدني جدًا في الدور.

7- من هو مثلك الأعلى في التمثيل.. وما هي الشخصية التي تتمنى تقديمها مستقبلًا ؟

ليونارندو دي كابريو مثلي الأعلى في التمثيل، ولو هختار حد من مصر ممكن أقول كريم عبد العزيز وماجد الكدواني.. أنا بحب أعمل حاجات مختلفة، أنا دلوقتي عملت دور الرومانسي الحبيب، فحابب أعمل دور مختلف لأني بحب التحدي، وكل ما الدور مختلف عن شخصيتي كل ما أكون حابب أعمله أكتر.

8- هل دخولك مجال التمثيل كان صدفة ولا كنت مخطط ليه ؟

دخولي مجال التمثيل مكانش صدفة بس كان حاجة عمري ما فكرت فيها وأنا صغير، ومكنش حلمي أني أطلع ممثل، ولما كنت بهزر في المدرسة وفي أول سنة جامعة مع المدرسين كانوا بيقولولي أنت مجربتش تمثل قبل كدا، فالموضوع جه في دماغي تاني سنة جامعة جالي دور صغير في مسلسل موضوع عائلي 1 عملته والموضوع عجبني أكتر فبقيت أخد ورش تمثيل وابتديت أحسن من نفسي، والموضوع مكنتش مخطط ليه من الأول.

9- هل هناك أعمال جديدة تحضر لها في الفترة القادمة ؟

فيه عمل لسه مخلص تصويره فيلم الحريفة إخراج أستاذ رؤوف السيد، ومعانا أبطال شباب كتير، نور النبوي، أحمد غزي، يوسف عمر، ومعانا ناس كتير وهو فيلم لذيذ كورة، وفيه أعمال جديدة بحضرلها إن شاء الله مش حابب أقول تفاصيل دلوقتي، بس كل اللي أقدر أقوله انتظروني في رمضان 2024، الدور اللي هعمله في رمضان اللي جاي دور مختلف تماما عن الدور بتاع عمر.