أجري دلوقتي مش راضيني وبفرح بدور الراقصة.. أبرز تصريحات عايدة رياض

حلت الفنانة عايدة رياض اليوم ضيفة على برنامج واحد من الناس، الذي يقدمه الإعلامي عمرو الليثي، ويذاع على شاشة تلفزيون قناة الحياة، وأثناء الحلقة جاوبت عايدة رياض على عدة أسئلة متنوعة، وفي ذلك التقرير سيرصد موقع تحيا مصر أبرز إجاباتها.

أبرز إجابات عايدة رياض في واحد من الناس

• أنا مكملتش الجامعة وسيبتها من أول سنة
• مش ندمانة على المشاركة في أفلام المقاولات ومشاركتش فيها عشان الفلوس
• بجامل كل الناس ومفيش حد بيجاملني
• الأجر اللي باخده دلوقتي مش بيرضيني ولا يساوي حجم موهبتي 
• بفرح أوي لما بيجيلي دور راقصة
• أنا خجولة جدا بعيدا عن الشاشة وممكن يتضحك عليا بسهولة
• في مشهدي مع عادل إمام في فيلم اللعب مع الكبار كان بيضربني بجد
• ياسمين صبري ممكن تكون نجمة شباك
• لو جالي عملين أحلى من بعض واحد للسقا والتاني لمحمد رمضان هختار محمد رمضان
• علاقتي بالوسط الفني دلوقتي علاقة جواز
• هفكر في الاعتزال إذا مقدرتش أقوم من على السرير

تجربة عايدة رياض مع السرطان

وفي الحلقة ذاتها، تحدثت الفنانة عايدة رياض عن تجربتها مع مرض السرطان، وقالت: أنا اتفاجئت زي أي حد، كنت بعمل مسلسل دهشة مع أستاذ يحيى الفخراني وابتديت اتعب شوية، وروحت لدكتور وحللت وأخدت علاج، وكل دا معرفش فيه ايه، وبعد 3 أشهر روحت عملت آشعة، طلع سرطان في المثانة.

وتابعت: وإحساسي وقتها كان صدمة، وقعدت 3 أشهر اتعالج وفي أول شهر كنت مخضوضة، ومكنش فيه حد يعرف خالص غير أخويا، وبعد أول 3 جلسات عملتهم في المستشفى قالي لازم تشتغلي، وفعلا نزلت الشغل وركبت بروكة، ومقولتش خالص أني تعبانة.

واستكملت: أنا إنسانة ضعيفة جدًا، وربنا هو أهم من كل حاجة، ودا اللي كنت بكلمه بس، وممكن لو قولت لحد يفتكر أني عايزة منه فلوس، واتعالجت، وكنت عملالهم جو جميل جدًا في المستشفى، وكنا بنهيص بليل، وبعد ما اتعالجت روحت لجراح قالي لازم تشيلي المثانة وتركبي مثانة صناعية، بس قررت أني مش هعمل العملية بعد استخارة، وبعدها أخويا جاله سرطان في الدم وبنته كانت 10 شهور، وكانت حالته أصعب مني بكتير.