محمد علي رزق عن أزمة مسلسل ليه لأ 3:مش هكابر أنا ضد تقيد الحريات وقررت انسحب من الصورة

خرج  الفنان محمد علي رزق ليؤكد على عدم تأيده لتقيد الحريات بعد الكشف عن  رأيه في مسلسل ليه لأ 3، بطولة الفنانة نيللي كريم.

تحيا مصر يرصد تأكيد محمد علي رزق على عدم تقيده للحريات.

أزمة مسلسل ليه لأ 3

ونشر محمد علي رزق مقطع فيديو عبر حسابه الشخصي على موقع تبادل الصور والفيديوهات القصيرة إنستجرام، وقال: بعد بيان النقابة، أنا قررت انسحب من الصورة تمامًا؛ لأن النقابة مشكورة طلعت البيان بتستنكر اللي حصل وبتهيب الشركة إنها تعتذر عن الخطأ وتحذف المشاهد، صحيت من النوم لقيت رسائل إني ضد حرية الإبداع وضد حرية الرأي وإن دي شخصيات درامية وإن ده كلام بيتقال على لسان شخصية درامية مش كلام في الشارع عشان ناخد ضده إجراء.

وتابع: وناس كتير قالتلي إن زي ما كان عندك الشجاعة وطلعت وطلبت من الناس تعتذر وصححت المعلومة الغلط اللي في المشهد لازم يكون عندك الشجاعة عشان خاطر تمنع تأييد الحريات، تمام يا جماعة مش هكابر أنا ضد تقييد الحريات وعايز أعيد وأكرر معلومة إني من جمهور مسلسل ليه لأ وقولتها في البوست والفيديو الأولاني ومعنديش مشكلة مع العمل نهائيًا أنا عندي مشكلة مع معلومة غلط.

تصريحات محمد علي رزق 

وأضاف: إحنا مش كلية نظرية يا أساتذة، إحنا كلية عملية، الشركة مشكورة وناس محترمين وورشة سرد وطلعوا بيان بيعتذروا فيه وبيقولوا إنهم بيفرقوا بين التجربة النظرية والتجربة العملية، آداب مسرح نظرية والأكاديمية تجربة عملية، أنا بردو بصحح المعلومة اللي في البيان يا فندم إحنا كلية عملية بندرس نفس مواد أكاديمية فنون وبندرس تعبير حركي ومناهج إخراج وفوكاليز ونوتة وكل المواد اللي بيتم تدريسها في أكاديمية الفنون بيتم تدريسها في آداب مسرح في جميع أنحاء مصر.

واستطرد: النقطة التانية إني أقول من الفيديو ده والفيديو اللي فات مش إثبات إني ممثل شاطر أو إني معايا شهادة عظيمة، خالص، الحمد لله الواحد في المهنة من زمان ودلوقتي عندي 37 سنة وبشتغلها من وانا عندي 15 سنة، فمش هاجي النهاردة أقول أنا ممثل، وراضي بحكم الجمهور وإن شاء الله أكبر عشان كده، أنا بتكلم عشان الطلاب الصغيرين اللي لسه بيشقوا طريقهم وبصححلهم المعلومة المغلوطة.

مسلسل ليه لأ 3

واختتم محمد علي رزق حديثه قائلًا: وأقسم بالله العظيم لا آداب مسرح ولا أكاديمية ولا الجن الأزرق بتعلم تمثيل الموهبة ثم الموهبة ثم الموهبة، فيه نجوم كتير على الساحة مدخلوش لا المعهد ولا آداب مسرح، أنا ضد تقييد الحريات ونقول أي حاجة وقد تكون غيرتنا الفنية على القسم بتاعنا حركتنا.. فأنا بقول إن المعلومة اللي في المسلسل غلط مش أكتر ولا أقل، حابين تقولوا حاجة براحتكم وأنتوا حرار وشكرًا على البيان بتاع الشركة اللي كان غلط بردو إحنا مش دراسة نظرية وإحنا دراسة عملية.