هيثم نبيل يرد على عمرو مصطفى: قدر زمايلك ومطلعهمش حرامية ورامي صبري مش فنان قليل عشان يسرقك

حرص الفنان هيثم نبيل الرد على تصريحات عمرو مصطفى الأخيرة واتهامه لعدد كبير من النجوم بسرقة ألحانه وأغانيه ونسبها إليهم.

تحيا مصر يرصد لكم تصريحات هيثم نبيل

وقال هيثم نبيل في فيديو عبر حسابه بموقع التواصل الاجتماعي فيسبوك: أنا عامل الفيديو ردا على صديقي الفنان اللي بحبه عمرو مصطفى عندي تحفظ على تصريحاته الفترة الأخيرة على الزملاء وعلى شكل الفن، أنا تحليلي للموضوع أن عمرو مصطفى عز فترة نجاحاته كانت كل الناس بتشوف إيه اللي ينجح وتجري وراه.

هيثم نبيل:  عندنا في مصر أنواع كتيرة من الموسيقى مختلفة

وتابع: الأغنية اللي تنجح كل المطربين يقفوا في طابور واحد وعاوزين نفس النجاح، مش عايزين يعملوا نجاح مختلف، لكن في آخر 10 سنين حصل تغيير في الأجيال وبقى في تنوع في الأذواق ودي حاجة صحية مش مضر وطول عمرنا بنشوف برا عندهم تنوع كبير وكل نوع من الأنواع ليه جمهوره، أنا كنت بغير جدا أن برا في التنوع دا، ودلوقتي بقى عندنا في مصر أنواع كتيرة من الموسيقى مختلفة وفي الآخر بيحصل تنقية كل حاجة جديدة الناس بتسمعها فترة وبعدها بتنقي.

واستكمل:  كون أن أحنا نتخض من اللي حصل ميقولش أن الصناعة بتنهار دي حاجة صحية، وبالعكس دي أكتر فترة نجاحات لمطربين كتير في مصر وبرا مصر، إزاي الصناعة منهارة وأحنا شايفين أن مثلا أحمد سعد بيغني من فترة كبيرة ودلوقتي في عز نجاحاته، والهضبة ومحمد منير وتامر عاشور ورامي صبري وتامر حسني كلهم ناجحين وبيتم استقبالهم في الخارج بشكل كبير، كون أن أنا في الفترة الأخيرة مش مشارك في النجاحات دي مش معناها أن الصناعة وقعت.

هيثم نبيل: رامي مش فنان قليل عشان يسرق عمرو مصطفى

كما تحدث هيثم نبيل عن اتهامات عمرو مصطفى لزملائه بسرقة بعض من ألحانه وقال: تاني حاجة تصريحات الاتهامات وأن عمرو مصطفى قال إن رامي صبري سرق منه أغنية "يمكن خير" في حاجة أسمها سرقة وفيه توارد أفكار، رامي فنان تقيل وعنده أغاني كتير ناجحة ومش الأغنية دي اللي هتصنع وتفرق في مشواره، ورامي مش فنان قليل عشان يسرق عمرو مصطفى، دي حاجات بتحصل".

هيثم نبيل لعمرو مصطفى: قدر زمايلك وادعمهم

وأكمل: "لو هنتكلم بالمفهوم بتاع عمرو مصطفى أنه بيتكلم عن الذوق العام مش المفروض أن طول عمرنا نغني لأم كلثوم وعبد الحليم لأن الأغاني اللي أنت قدمتها وأحنا حبيناها هي مش سيرة الحب، الحرب اللي بتحاربها عن فكرة ذوق الناس المفروض تدعم كل الناس متطلعش الزملاء حرامية، لو شايف أنها حرب قدر زمايلك وكلنا ندعم بعض، لكن عن نفسي مش بشارك في الحروب دي لأن كل نوع فن بيتقدم ليه ناسه وجمهوره".