ياسمين غيث: عايشة بصعوبة ولسه عندي ألم بس مكملة

كشفت الفنانة ياسمين غيث إنها مازالت تتعافي من مرض السرطان، كما أنها تخضع للفحوصات بشكلي دائم للأطمئنان على حالتها الصحية، كما وجهت رسالة إيجابية لجمهورها.

تحيا مصر يرصد لكم الحالة الصحية لياسمين غيث

ياسمين غيث: الحياة علمتني إنها صعبة

وكتبت ياسمين غيث عبر حسابها بموقع تبادل الصور والفيديوهات انستجرام: الحياة علمتني إنها صعبة، أوقات مستحيلة، متعبة، مؤلمة، و مليانة عذاب... بس كمان علمتني إني لما بركز على "الأمل"، على الإيجابية، على الحلو اللي فيها، اللي مش بندوقه غير بعد كل الوحش اللي فوق.

ياسمين غيث: لسه عندي أمل بس مكملة

وتابعت:  بحاول أقف على رجلي تاني، مش سهلة، بس بحاول.. لسة عندي ألم بس مكملة.. لسة بعيط و بزعل من غير أسباب حقيقية في أوقات كتير من كتر صعوبة اللي عديت و بعدي بيه.

وكشفت: عايشة بفحوصات كل شهر و 2 و 3 و 6  يعني طول الوقت تقريبا بس بحاول أستمتع بالحياة بينهم، عايشة بصعوبة بس ألف حمد و شكر "لسة عايشة".. بحبكم و بحاول أرجع علشانكم.

الحالة الصحية لياسمين غيث

وسبق وكشفت الفنانة ياسمين غيث عن تطورات حالتها الصحية، وذلك بعد خضوعها لعملية جراحية لإزالة ورم حميد جديد، واحتجازها في المستشفى، ونشرت ياسمين غيث صورًا لها أثناء خضوعها للعملية وذلك عبر حسابها بموقع تبادل الصور والفيديوهات انستجرام: عارفة إنكم قلقانين عليا ومش عايزة اتأخر عليكم أكتر من كده رغم تعبي لسه.

وأضافت: مبدئيًا ده شكلي معظم الـ 5 شهور اللي فاتوا...من شهر 11 حتى الآن، الحمد عملت العملية يوم ٦/٢ (عملية open chest لإزالة ورم حجمه ٨ سم+) الحمد لله ألف حمد وشكر طلع حميد وطلع إنه كتلة من الغدة الدرقية وده هيحتاج إني أعمل فحوصات وcheck up علي الغدة كل 3 شهور، ده طبعا غير الـgeneral check up اللي بعمله كل 6 شهور. الحمد لله علي كل حاجة.

وتابعت: عاملة إيه؟ تعبانة...حاسة بإيه؟ ألم لا يحتمل...في عضمي، في ضلوعي، في أعصابي.. بس كدة؟ لأ.. العملية مكانها صعب والفتح في عضم الصدر ألمه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا؟ أنا من 7 سنين عملت عملية الـ breast cancer اللي شالوا فيها من صدري اليمين جزء من العضلة، ومعظم الغدد (lymph nodes) اللي تحت الذراع وده أثر من وقتها على ذراعي اليمين وفضل كذا شهر بيوجعني وبعد كدة كمّل معايا التنميل والوجع بس محتمل.

وأضافت: ادعوا لي أرجع زي الأول، أنا بقى لي 5 شهور عملت فيهم 4 عمليات بين المستشفيات والعناية المركزة والدكاترة والفحوصات وأوجاع لا تحتمل والله، ادعوا لي علي الأقل أرجع أعيش من غير ألم تاني. أنا الحمد لله بتحسن بالعلاج الطبيعي بس ببطأ شوية.