عمرو مصطفى: المطربين بدأوا يخافوا مني وويجز بيشتري المزيكا من على النت

كشف الفنان عمرو مصطفى عن سبب خلافاته مع الفنانين خلال الفترة الأخيرة، كما تحدث عن مطرب الراب ويجز وشرائه للموسيقى.

تحيا مصر يرصد لكم تصريحات عمرو مصطفى

وقال عمرو مصطفى خلال ساتضافته في برنامج حبر سري والتي تقدمه الإعلامية أسما إبراهيم ويعرض عبر قناة القاهرة والناس: متعتي في الحياة هي المزيكا مش إني اتخانق مع حد وده بيخليهم بيغيروا مني عشان مركز في شغلي.

عمرو مصطفى: أنا بدافع عن نفسي عشان مفيش حد يقرب مني

وتابع: أنا لا ليا علاقة بالغرور ولا النرجسية ودايما بدفع عن نفسي عشان مفيش حد يقرب مني ويأذيني، أنا عايز أعمل شغل ومزيكا والناس تتبسط باللي قدمه ومعايا نجوم بيزعلوا من عصبيتي في شغلي.

عمرو مصطفى: في الموسيقى بنسى عمرو مصطفى الإنسان

وأضاف: أنا بدافع عن نفسي وأنا لو عليا مش عايز أجيب سيرة حد وأنا بحب شغلي ولما بتعامل مع إي حد في الموسيقى وبنسى عمرو مصطفى الإنسان وبفكر أنا هقدم إيه وناس كتير بتفتكر إني مغرور.

وكشف عمرو مصطفى: لما روحت لدكتور نفسي قعدت تحكيلي عن مشاكلها وبقيت أنا الدكتور بتاعها، وناس كتير قالتلي انت لازم تروح لدكتور نفسي.

عمرو مصطفى: المطربين خافوا مني بعد ما عملت أغاني تريند

واستكمل: أنا بحب الموسيقى أوي وبتخانق وبعمل مشاكل عشانها، ولما عملت الذكاء الاصطناعي فاجأة الناس كلها هاجمتني لمجرد إني بفكر في فكرة جديدة، ولما عملت أغاني بقت تريند ابتدى مطربين يخافوا مني، و أنا المبدع والمطرب مجرد أداة بيغني بس.

عمرو مصطفى: ويجز بيشتري مزيكا جاهزة

كما تحدث عن خلافه مع مطرب الراب ويجز مؤكدًا أنه يشتري أغاني من على المواقع ولا يعتمد على ملحننين ولا موزعين وقال: ويجز بيشتري مزيكا جاهزة وبيتعب في اختيار الموسيقى من على النت، وهو فهم غلط أنا كنت بشكر فيهم وبقول أن ده استايل الموسيقى في العالم وهما مميزين.

وتابع: أنا هعمل كده بس هعلم الناس كلهم وهقولهم اني خدت الموسيقى وعملت عليها لحن وده اللينك ولو تعرفوا اعملوا لحن اعملوه زيي.