أمير عيد: فكرة الفنان قدوة كرهتنا في فنانين كتير وجملة المصريين بيحبوا الهلس تقلل مننا

تحدث الفنان أمير عيد عن طفولته، كما كشف عيد أنه لا يرى نفسه كقدة للبشر، ولا يعترف بمصطلح القدوة والألقاء التي يضعها الجمهور للفنان.

تحيا مصر يرصد لكم تصريحات أمير عيد

وقال أمير عيد خلال برنامج Grow talks: كنت شايف نفسي مطرب وأنا صغير، وكنت بتخيل نفسي من وأنا طفل إني هكون مطرب وحواليا جمهور، وبعتبر نفسي إنسان محظوظ وربنا أنعم عليا بنعم كتير بحمده عليها يوميا، والفن اللي بقدمه بيكسر المألوف.

أمير عيد: جملة المصريين بيحبوا الهلس تقلل مننا

وتابع: لازم الفنان يحترم مهنته، وفيه أشخاص بيسطحوا مهنة الفن ومش بيحترموا المستمع وبيعتبروه سلعة، وجملة المصريين بيحبوا الهلس تقليل مننا وكأننا قطيع رغم إن كل شخص مختلف عن التاني.

أمير عيد: فكرة الفنان قدوة كرهتنا في فنانين كتير أوي

وكشف: مش شايف نفسي قدوة أنا إنسان، وأنتوا قررتوا أني قدوة، وفكرة الفنان قدوة كرهتنا في فنانين كتير أوي، وتغلبت على فكرة القدوة واعتبرت نفسي إنسان على طبيعتي.

وأضاف أمير عيد: في مره كنت عامل أغنية وحد شتمني عليها.. كنت قايم أضربه بطبيعتي، ولكن لقيت صاحبي بيقولي أنت شخصية عامة فرحت، ولكن مقدرتش معملش كده، ولما حد بيقولي أنا بحبك أوي بحس أني مستحقش ده لأنه قالها بزيادة جدًا.. وهو ممكن يكون أحسن مني بكتير.. وأنا عارف نفسي وبيجيلي أفكار وحشة لأني بني آدم في الآخر.

وأضاف: الكلام الحلو الكتير ممكن تصدقه ونفس الكلام لو قال كلام وحش، ولو حد تجاوز برد عليه وبشتمه.. وأنا متلصن بالعافية أني أحافظ على نفسي كـ بني آدم.

أمير عيد: مش بهتم برأي المجتمع

وكشف أمير عيد في اللقاء ذاته أنه لا يأمن برأي المجتمع وقال: أنا مش بؤمن بالمجتمع في حتة الحكم على الناس وعندي تجاهل برأي المجتمع ومش بحب التقاليد والعادات وبحاول أفهم التقاليد دي جاية منين وأنا إنسان حر بعمل اللي أنا عايزه ومش مهتم برأي المجتمع.

واستطرد: عمري ما عملت خطة في حياتي واتنفذت، وأنا خطتي في الحياة هو النهارده وبشوف كل 5 ساعات بفكر أعمل إيه، وبشوف إن مفيش حد زي حد يعني العسيلي هو واحد ونفس الكلام على إيهاب توفيق أو محمد منير.. وفيه ناس صوتها حلو جدا.