أمير كرارة: دور المنسي غير في شخصيتي وأثر فيا وكان كرم وهدية من ربنا

تحدث الفنان أمير كرارة عن أهيمة مسلسل الاختيار في مشواره الفني، موضحًا أن شخصية المنسي أثرت بشكل كبير في حياته الشخصية.

تحيا مصر يرصد لكم تصريحات أمير كرارة

وقال أمير كرارة خلال استضافته في برنامج معكم التي تقدمه الإعلامية منى الشاذلي ويعرض عبر قناة سي بي سي: الشنب بطل في حياتي وأنا شكرته ساعة كلبش، ورغم أن في شنبات كتير بس شنبي الوحيد اللي علم مع الناس.

أمير كرارة: العساكر بتقولي يا قائد 

وتابع: الاختيار تجربة عظيمة بالنسبالي ودور المنسي غير في شخصيتي وطريقتي وأثر فيا بشكل غير طبيعي، و العساكر بتقولي يا قائد والداخلية بتقولي يا باشا مصر.

أمير كرارة: دور المنسي كرم وهدية من ربنا

وأضاف: دور المنسي كرم وهدية من ربنا وأنا مش عبقري تمثيل وفي ناس كتير أحسن مني، لكن ربنا أداني الدور وكان أي ممثل كبير أو صغير كان هيعمل الدور حلو ويحصله اللي حصلي.

وأضاف: زمان لو واحدة ماشية مع خطيبها وجت تتصور معايا كان بيمنعها وبيقلق مني ويقولها متتصورش معايا لكن بعد المنسي بقى يسيبها تتصور معايا ويقولها ده راجل محترم.

واستكمل أمير كرارة: بعد دور المنسي الناس بقت بتبصلي بصة حلوة ومش عايز أعمل أي حاجة تضيع نظرة الناس دي ليا.

تصريحات أمير كرارة

وفي اللقاء ذاته، تحدث أمير كرارة عن كواليس فيلم البعبع، وقال كنت مرعوب من الفيلم وأتعرض عليا بطريقة مختلفة، وكان عندنا عوامل كتير في الفيلم وهو ميكس غريب، والفيلم كوميدي أكتر وعائلي ومحترم وممكن العيلة كلها تدخل الفيلم وهتتبسط بيه.

وأضاف: أنا اتاخرت في موضوع السينما شوية وكنت مركز في المسلسلات أكتر آخر فترة، وأنا عملت حرب كرمز وكان حلو جدا، و أنا وبيتر ميمي وش السعد على بعض ولما اشتغلنا كلبش كان سلمة جديدة في حياتنا، وكان جوايا تحدي بالنسبالي وأبين للناس أن لسه عندي كتير وبقالنا زمان متعملش فيلم أكشن كوميدي زي فيلم البعبع.

وعن تعاونه مع عدد من الأطفال خلال الفيلم قال: الشغل مع الأطفال حاجة مميزة جدًا، و أنا اقرب حد ليا في حياتي هما ولادي من صغرهم بصاحبهم أنا اللي مربيهم، وأنا بخرج معاهم وشلتي اللي بستمتع بيهم وبروح السينما ومعايا 15 عيل، وبيقعدوا 3 أيام في مصر و 3 في الساحل وأنا بالنسبة ليهم بابا نويل وبحققلهم أحلامهم وبعرف أتعامل مع السن الصغير.