سعد الصغير لتحيا مصر: أنا السبب في شهرة بوسي ومش عايز أعمل تريند على قفاها

هاجم الفنان سعد الصغير الفنانة بوسي بعد تصريحاتها الأخيرة في برنامج حبر سري وكشفها عن سبب الخلاف الذي حدث بينها.

تحيا مصر يرصد لكم تصريحات سعد الصغير

وقال سعد الصغير في تصريحات لموقع تحيا مصر: بوسي بتقول إني عايز التريند وهي اللي مدخلاني في حياتها من ساعة ما اتجوزت وجوزها كان بيضربها.

سعد الصغير: أنا اللي جايب آه يا دنيا لـ بوسي

وكشف المطرب سعد الصغير: أنا اللي جايب أغنية آه يا دنيا لـ بوسي وأديتها الأغنية أيام ما كانت بتلبس كوتش بـ 15 جنيه، وكنت السبب في شهرتها

سعد الصغير: بوسي كدابة ومراحتش تزور والدها قبل ما يموت

واستكمل سعد الصغير: بوسي طلعت قالت مع بسمة وهبة أن هي زارت أبوها قبل ما يموت وهي كدابة ومعملتش كده، وبوسي خدت الشقة اللي كنت جايبها لأبوها بـ 200 ألف جنيه وخدت حاجتي ومرضتش تدي لاخواتها أي حاجة.

وأوضح سعد الصغير: بوسي رفضت تدي لأبوها 4000 جنيه عشان يعمل عملية في عينه والإعلامي عمرو الليثي اللي عمله العملية.

سعد الصغير: مش عايز أعمل تريند على قفا بوسي

وكشف: كنت بحل كل مشاكلها مع طليقها، وهو قال في القسم أن هي اللي حطيتله الترامادول تحت السرير ومرضتش أتكلم وقتها عشان معملش تريند على قفاها.

تصريحات بوسي

وكانت قد تحدثت الفنانة بوسي، عن سبب خلافها مع الفنان سعد الصغير وعن حقيقة خطوبتهما، وقالت بوسي، ببرنامج "حبر سري": "أنا مش بعمل نجمة على حد وده مش أسلوبي، وسعد عامل خاصية في تليفونه وقافله 24 ساعة، وأنا قاطعته لإنه تدخل في موضوع أبويا، ودي حاجة مش من حقه يتدخل فيها.

وعن شائعة خطبتها من سعد الصغير عام 2015 ، فقالت بوسي: "سنة 2015 كنت على ذمة طليقي، أتخطب لسعد الصغير إزاي؟ ولا في 2016 أو بعد طلاقي".

وكان سعد الصغير هاجم المطربة بوسي بعد وفاة والدها، وقال في مداخلة ببرنامج "عرب وود": "إنتي حرمتي أبوكي من الفرح في آخر أيامه.. كان بيتمنى تسألي عليه بس، وآخر كلمة قالها حسبي الله ونعم الوكيل".