لبنى ونس عن محمد رمضان: كنت خايفة منه طول مسلسل جعفر العمدة

أدلت الفنانة لبنى ونس بعدة تصريحات خلال حلولها ضيفة على الإعلامية شافكي المنير في برنامجها التاسعة، الذي تقدمه عبر شاشة قناة الأولى المصرية.

ويرصدها تحيا مصر خلال السطور التالية:

تصريحات لبنى ونس

-كواليس جعفر العمدة كانت عاملة زي الكتيبة والخلية، وكل واحد كان عارف هو بيعمل إيه وده اللي خلق جزء كبير من نجاح العمل، وكان في رب للعمل اللي هو المخرج محمد سامي ومفيش حد فوق حد ومفيش حاجة اسمها نجم وأقل منه.

- أنا كان في أحاسيس مضطربة جدًا بيني وبين محمد رمضان كنت عايزاه يختفي لأني خايفة منه طول مسلسل جعفر العمدة، وكانت مشاعر قلق طول الوقت من بعد ما أسلم عليه كنت باخد مشاعر الشخصية.

لبنى ونس في برنامج التاسعة

- كان في كيمياء بيني وبين أحمد داش ومكنش عندي شك أي لحظة أنه مش ابني، وهو كان عنده نفس الإحساس وكنا في الحالة ومش عايزين نخرج منها.

- لما رجعت لـ الفن وجدت تغيير في الوسط الفني 180 درجة، وهنا كانت الصدمة هواكب إيه ولا إيه أنا اتربيت في الأبيض والأسود.

- محمد سامي هو اللي مرشحني وقالي إن الدور ده عصب الرواية وده الأساس، والشخصية مش بس أم خايفة تفقد ابنها اللي ربته هي من البداية زي أي سيدة في المجتمع اتطلقت مرتين علشان مبتخلفش، يعني عندها حالة نفسية سيئة جدًا.

- مشاعر الأم على الشاشة مش سهلة خالص والشخصية الناس تعاطفت معاها علشان صدقوها وحبها للولد وتمسكها بيه، وفي نفس الوقت كنت بذاكر ملاحظات محمد سامي أن الشخصية طيبة جدًا.

- محمد سامي فاجئني زي الجمهور أنه بدل ما يعمل ميك آب أو يجبلي دوبلير جاب برنامج بيستخدموه في هوليوود يصغرني، برافو عليه أنا اتفاجئت.

- حسيت إني مش هعرف أوفق بين البيت والأولاد والفن، واختارت إني أرجع تاني الفن لما أولادي يكبروا، وبعد ما كبروا رجعت.

- التمثيل مهنة وموهبة من ربنا، وفكرة أن الفنان والنجم بحسها للتريند زي ما بيقولوا، وفي كتير جدًا من النجوم مع احترامي ليهم مش ممثلين.

آخر أعمال لبنى ونس

وتألقت لبنى ونس في مسلسل جعفر العمدة من إخراج وتأليف محمد سامي، وتدور أحداثه في إطار اجتماعي حول شخصية جعفر الذي يعيش في منطقة السيدة زينب الشعبية بالقاهرة مع زوجاته الأربع.. يتعرض البطل لخطف طفله‭‭ ‬‬‬الرضيع قبل 19 عاما ويتابع المشاهدون رحلته في البحث عن ابنه وتعامله مع المكائد التي يدبرها له بعض المقربين منه.

وتشارك في بطولة المسلسل مجموعة الفنانات أبرزهن؛ زينة ومي كساب ومنة فضالي وإيمان العاصي اللاتي يقمن بأدوار زوجات جعفر، وهالة صدقي التي تقوم بدور والدته صافية.