منى هلا: الست بتستمد قوتها من شغلها مش من الراجل

كشفت الفنانة منى هلا عن تفاصيل تخص حياتها الشخصية، وعلاقتها مع زوجها الأجنبي، وذلك خلال لقاء لها ببرنامج الستات المذاع على شاشة تلفزيون قناة النهار.

تحيا مصر يرصد تفاصيل تصريحات منى هلا في برنامج الستات

زواج منى هلا

وقالت منى هلا: أصحابي محدودين جدًا وبعرف أعيش من غير الناس، أنا مقلة جدًا في علاقاتي الإنسانية.. وموضوع جوازي مخدش وقت، واللي لفت نظري لجوزي أنه طيب جدًا وبيحب شغله، وهو مدرب هوكي.

وتابعت: الجواز مش صعب برا بلدي، لأن احنا مش بنتقابل كتير، هو عايش في فيينا وأنا ما بين هنا وفيينا، لأني بحس أن الناس لما بتقرب مع بعض أوي أو عايشين في وش بعض دا بيسبب مشاكل كتير.

وأضافت: واحنا الاتنين بنثق في بعض جدًا، وكل كابل حياته مختلفة عن التاني، والست بتستمد قوتها من شغلها مش من الرجل، وأنا بحب الستات هنا في مصر، وبحترم جدًا الست اللي بتحب شغلها، وبحس أن البلد دي قايمة على كتاف الستات.

تصريحات منى هلا في برنامج الستات

وفي الحلقة ذاتها، تحدثت الفنانة منى هلا عن تفاصيل عملها في أوروبا وهوليود، وحقيقة حلمها بالعالمية، وقالت منى هلا: بتعامل مع مهنة التمثيل على أني ممثلة تحت الطلب، زي الدكتور وزي المهندس، والتمثيل برا مش سهل، أنا تتلمذت على يد ناس عظماء جدا في مصر وبرا مصر، وهما معلمني ازاي احترم المواعيد، وزمايلي على المسرح.

وتابعت: النظام الرأسمالي في أمريكا كان بالنسبالي مش مناسب لشخصيتي، أنا مبحبش الفرق الطبقي بين الأغنيا والفقرا الكبير، في أوروبا معظم الناس عايشين طبقة وسطى.

منى هلا: بحب أخد حقي من اي حد ضايقني

وسبق وأن كشفت منى هلا عن رأيها في العنصرية بين الرجل والمرآة قالت: أنا ضد تقسيم الناس على ده رجل او ست وانا اتعرضت لشر في حياتي من راجل ومن ست بس أنا خدت حقي ومش بحب أسيب حقي، ولازم أننا ناخد حقنا من شخص لو ضايقنا وبعدها ممكن نرجع صحاب عادي

وكشفت: أنا بحب النضافة جدا في البيت ومفيش حد بيدخل عندي  البيت بالجذمة ولو معايا حد مش نضيف مش هكمل جواز معاه، هي في مشاكل بسيطة بتؤدي للطلاق ولازم نتجوز حد نعرف نعيش معاه مش نحبه.